काठमाडौं – ‘पेन डाउन’ गरेर आन्दोलनमा होमिएका भन्सार एजेन्ट र भन्सार विभागबीचको वार्ता सकारात्मक रुपमा टुंगिएको छ।बुधबार भन्सार विभागमा भएको वार्ताको क्रममा व्यावहारिक पक्षहरू तत्काल कार्यान्वयन गर्ने र ऐन, नियमावलीमा भएका व्यवस्था सम्बोधनका लागि अर्थ मन्त्रालयसँग सहजीकरण गर्ने सहमति भएको हो।
यससँगै मंगलबारदेखि पेन डाउन गरेर आन्दोलनमा होमिएका एजेन्टहरू काममा फर्किएका छन्। गएको शनिबारदेखि कार्यान्वयनमा आएको नयाँ भन्सार ऐनको विरोधमा भन्सार एजेन्टले देशभरका कार्यालयमा मंगलबारदेखि ‘पेन डाउन’ गरेका थिए। जसले गर्दा भन्सार जाँचपासलगायत काम प्रभावित भएका थिए।
मंगलबार पनि विभाग र एजेन्ट महासंघका प्रतिनिधिबीच करिब २ घण्टा वार्ता भएको थियो।भन्सार एजेन्ट महासंघले भन्सार ऐन २०८२ मा भएको दण्ड जरिवानाका प्रावधानमा आपत्ति जनाएका थिए।सजायको प्रावधानले भन्सार एजेन्ट इजाजत पत्र प्राप्त व्यक्तिलाई हतोत्साहित पार्ने महासंघले जनाएको छ। यसले पेशागत हकहित, काम गर्ने वातावरण तथा अन्तर्राष्ट्रिय व्यापार सहजीकरणमा समेत असर पुर्याउने महासंघको भनाइ थियो।
