क्यानडाको आकाशमा पनि देखियो ‘मानवरहित अज्ञात वस्तु’, प्रधानमन्त्री आदेशमा खसालियो

क्यानडाका प्रधानमन्त्री जस्टिन ट्रुडोले उत्तर अमेरिकी वायु क्षेत्रको माथि आकाशमा देखिएको अर्को ‘अपरिचित वस्तु’ लाई गोली हानेर खसालिएको पुष्टि गरेका छन् ।उनले उक्त अज्ञात वस्तुले ‘क्यानडाको हवाई क्षेत्रको’ उल्लङ्घन गरेको र उत्तर पश्चिमी क्यानडाको युकोन नजिक खसालिएको जानकारी दिए ।

अमेरिका र क्यानडा दुवैले यो वस्तुलाई ट्र्याक गर्नका लागि आफ्नो विमान प्रयोग गरेका थिए । ट्रुडोका अनुसार अमेरिकी एफ–२२ जेटले उक्त वस्तुलाई आक्रमण गरी खसालेको हो ।

पहिला बेलुन र त्यसपछि अज्ञात वस्तु भेटियो

– पछिल्लो हप्तामा उत्तर अमेरिकाको आकाशमा उडिरहेको वस्तु खसालिएको यो तेस्रो पटक हो ।

– गत हप्ता शनिवार अमेरिकी सेनाले दक्षिण क्यारोलाइना एट्लान्टिक तटमा चिनियाँ बेलुन खसालेको थियो ।

– त्यसपछि शुक्रवार अलास्का नजिक एउटा सानो कार आकारको अज्ञात वस्तु खसालिएको थियो ।

– यसको भग्नावशेष खोज्न ब्युफोर्ट सागरको जमेको पानी वरपर हेलिकप्टर र ट्रान्स पोर्ट विमानहरू तैनाथ गरिएको छ ।

– यसपछि अब क्यानडाले अर्को अज्ञात वस्तु खसेको पुष्टि गरेको छ । क्यानडाली सेनाले यसको भग्नावशेष खोजिरहेको छ ।

क्यानडाले के भन्यो ?

क्यानडाका रक्षा मन्त्री अनिता आनन्दले अहिले आकाशमा देखिएको वस्तु मध्य युकोनबाट ४० हजार फिट माथि हावामा उडेको देखेको बताइन् । यसलाई स्थानीय समय अनुसार शनिवार दिउँसो ३ः४१ मा खसाइएको थियो ।

यो ‘सिलिन्डर जस्तो देखिने सानो वस्तु’ भएको भन्दै यसको भग्नावशेषको खोजी सुरु गरिएको उनले बताइन् ।

अनिता आनन्दले अमेरिकासँगको सिमानाबाट सय माइलको दुरीमा खसाइएको बताइन् । उनले भनिन्, ‘यसले यात्री विमानका लागि खतरा पैदा गरिरहेको थियो ।’

उनले यो वस्तु अमेरिकाले गत शनिवार साउथ क्यारोलाइना तटमा खसालेको बेलुनभन्दा निकै सानो भएको बताइन् । यो बेलुन करिब ६० मिटर अग्लो थियो ।

ट्रुडोले आकाशमा देखेको यो अज्ञात वस्तुलाई खसाल्न शनिवार आदेश दिएको बताउँदै  यसबारे अमेरिकी राष्ट्रपति जो बाइडेनसँग पनि कुरा गरेको जानकारी दिए ।

उनले सामाजिक सञ्जालमा लेखेका छन्, ‘मैले क्यानडाको हवाई क्षेत्र उल्लङ्घन गर्ने अज्ञात वस्तुलाई खसाल्ने आदेश दिएको छु । युकोनमाथि भएको यो अज्ञात वस्तुलाई सेनाको नर्थ अमेरिकन एरोस्पेस डिफेन्स कमान्ड (नोराड) ले खसालेको छ । अमेरिका र क्यानडाले मिलेर काम गरे र अमेरिकी एफ–२२ ले यसलाई सफलतापूर्वक हमला गरेर खसाल्यो ।’

अर्को ट्विटमा उनले नोराडलाई यसका लागि धन्यवाद दिए र भने, ‘मैले यस विषयमा राष्ट्रपति बाइडेनसँग कुरा गरेको छु । क्यानडाली सेनाले अब यो अज्ञात वस्तुको भग्नावशेष सङ्कलन गर्ने काम गर्नेछ ताकि यसको विश्लेषण गर्न सकियोस् ।’

यसअघि नोराडले उत्तरी क्यानडाको आकाशमा ‘अत्यधिक उचाइमा’ एक अञ्जान वस्तु तैरिरहेको देखिएको र यसमाथि आफूले निगरानी गरिरहेको बताएका थिए । उत्तर अमेरिकी एयर स्पेस डिफेन्स कमान्ड अमेरिका र क्यानडाको हवाई क्षेत्रको सुरक्षाका लागि जिम्मेवार छ ।

अमेरिकी ह्वाइट हाउसले पनि यो वस्तुलाई ट्र्याक गरिरहेको र पछिल्लो २४ घण्टादेखि यसलाई सूक्ष्म तरिकाले निगरानी गरिरहेको बताएको थियो ।

‘तर सुरक्षाको हितमा र सेनाको सल्लाह पछ्याउँदै, अमेरिकी राष्ट्रपति जो बाइडेन र क्यानडाका प्रधानमन्त्री जस्टिन ट्रुडोले यसलाई खसाल्ने आदेश दिएका छन् । दुवै नेताले यसको भग्नावशेष पाउनुपर्ने कुरामा जोड दिएका छन् र यसमार्फत यसको उद्देश्यबारे पत्ता लगाउन र यो कहाँबाट आएको थियो भनेर पत्ता लगाइने बताइएको छ ।’

अमेरिकाले के भन्यो ?

यस मिसनबारे जानकारी दिँदै अमेरिकी रक्षा मन्त्रालयले दुई एफ–२२ फाइटर जेटले अलास्काको एन्कोराजबाट एलमेन्ड्रोफ–रिचर्जसन सैन्य अड्डाबाट उडान भरेको र ओआईएम ८एक्स मिसाइलमार्फत यो अञ्जान वस्तुमाथि हमला गरेर यसलाई खसालिएको जानकारी दियो ।

यसै क्रममा पेन्टागनका प्रवक्ता प्याट राइडरले यस वस्तुको भग्नावशेष पत्ता लगाउने काम क्यानडाका अधिकारीहरूले गर्ने र यस अवधिमा एफबीआईले क्यानडाली प्रहरीसँग मिलेर काम गर्ने बताएका छन् ।

अहिलेसम्म यो अज्ञात वस्तु के थियो भन्ने खुल्न सकेको छैन ।

तर यो अज्ञात वस्तु उत्तर अमेरिकाको आकाशमा यस्तो अवस्थामा देखिएको हो जब केही दिन अघि अमेरिकामा एक चिनियाँ बेलुन देखिएको थियो ।

यो बेलुन अमेरिकी क्षेत्रबाट अलि टाढा गएपछि अमेरिकाले यसलाई साउथ क्यारोलाइना माथिको समुन्द्रमा खसालेको थियो ।

चीनले अमेरिकाको यस कार्यको आलोचना गर्दै यो मानवरहित बेलुन मौसमसम्बन्धी जानकारी सङ्कलन गर्ने क्रममा बाटो बिराएर त्यहाँ पुगेको बताएको थियो । तर, अमेरिकाले यो जासुसी बेलुन भएको भन्दै यसमा निगरानी गर्ने क्षमतासमेत रहेको बताएको थियो ।