महासंघका अध्यक्ष र संयुक्त राष्ट्र संघ आवासीय संयोजक बीच भेटवार्ता-दिगो बिकास लक्ष्य कार्यान्वयन र स्तरोन्नतिमा सहकार्य प्रस्ताव

नेपाल उद्योग वाणिज्य महासंघका अध्यक्ष चन्द्र प्रसाद ढकाल र नेपालका लागि संयुक्त राष्ट्र संघका आवासीय संयोजक हाना सिंगर-हमदी (Ms. Hanaa Singer-Hamdy, United Nations Resident Coordinator in Nepal) बीच आज महासंघ सचिवालयमा औपचारिक भेटवार्ता गर्नुभयो ।

उक्त भेटवार्तामा दुई संस्थाबीच दिगो विकासका लक्ष्यहरू (Sustainable Development Goals-SDGs) कार्यान्वयन र अतिकम बिकसित मुलुकबाट नेपालको स्तरोन्ती (Nepal’s Graduation from LDCs) बाट पर्न सक्ने प्रभाव न्युनिकरणका लागि सहकार्य गर्ने बिषयमा छलफल भएको थियो । साना तथा मझौला उद्योग व्यावसायको क्षमता विकास, दक्ष जनशक्ति उत्पादन, निजी क्षेत्र र तीनै तहका सरकारसंगको सहकार्य लगायतका बिषयमा सहकार्य गर्नेबारे पनि दुई संस्थाका प्रमुखबीच छलफल भएको थियो ।

उक्त अवसरमा संयुक्त राष्ट्र संघका आवासीय संयोजकलाई महासंघ सचिवालयमा स्वागत गर्नुहुंदै अध्यक्ष ढकालले मुलुकभर बलियो संजाल हुनुका साथै तल्लो तहसम्म पुग्न सक्ने संरचना महासंघको भएकाले दिगो विकास लक्ष्य पुरा गर्न महासंघ महत्वपूर्ण साझेदार हुनसक्ने बताउनुभयो ।

महासंघको नयां नेतृत्वले अगाडी सारेका पांच प्रमुख प्राथमिकताहरु, आर्थिक संकटको समाधानको लागि रणनीति तय गर्ने, लगानीको वातावरण वनाउने, राज्य र निजी क्षेत्र बीचको साझेदारी सुदृढ गर्ने, दक्ष जनशक्ति उत्पादन र रोजगारी सृजना गर्ने, व्यवसायीको सम्मानबारे अध्यक्ष ढकालले जानकारी गराउनुभएको थियो ।

सो अवसरमा आवासीय संयोजक हाना सिंगरले महासंघका अध्यक्षले राख्नुभएका विषयलाई आफूले महत्वका साथ लिएको बताउनु भयो ।

आवासीय संयोजक हानाले दिगो बिकास लक्ष्य र स्तरोन्नति विशेष चासोको बिषय रहेको वताउनुभयो । लक्ष्य हासिल गर्न स्तरोन्नतिबाट नकारात्मक प्रभाव न्युनिकरणका लागि महासंघको भूमिका प्रभावकारी हुने उहाँको धारणा थियो ।

स्तरोन्नतिलाई सहज बनाउन रणनीति तयार पार्ने क्रममा सरकार, निजी क्षेत्र र संयुक्त राष्ट्र संघले सहकार्य गर्न सक्ने उहाले बताउनुभयो ।

सो अवसरमा महासंघका महानिर्देशक गोकर्णराज अवस्थीले दीगो विकासका लक्ष्यहरु र आर्थिक स्तरोन्तीमा महासंघकातर्फबाट अहिलेसम्म भएका प्रयासहरुका सम्बन्धमा जानकारी गराउनु भएको थियो ।

उक्त औपचारिक भेटवार्तामा संयुक्त राष्ट्र संघ नेपाल कार्यालय र महासंघ सचिवालयका अधिकारीहरुको उपस्थिति थियो ।