हरिवनमा १२१ क्षयरोगी फेला परे

सर्लाही  : सर्लाहीको हरिवन नगरपालिकामा गत आर्थिक वर्षमा एक सय भन्दा बढी नयाँ क्षयरोगी फेला परेका छन्। गत आव २०७९/८० मा १२१ क्षयरोगी फेला परेका नगर स्वास्थ्य शाखाका संयोजक रामबाबु चौधरीले जानकारी दिए।

उहाँका अनुसार फेला परेका नयाँ क्षयरोगीमध्ये ११९ जनाको उपचार सफल भएको छ । आव २०७८/७९ मा ११० जना क्षयरोगी फेला परेका थिए । क्षयरोगका नयाँनयाँ बिरामी फेला परे पनि पुराना बिरामीमा रोग निर्मूल गर्नका लागि चुनौती रहेको र नगरका स्वाथ्यकर्मीको प्रयासले मात्रै सो सम्भव नरहेको नगर स्वास्थ्य शाखाले जनाएको छ ।

शाखाले क्षयरोग निर्मूल गर्न जनप्रतिनिधि, सामुदायिक तथा निजी स्वास्थ्य संस्था, समाजसेवी, राजनीतिक दलका नेतालगायत मिडियाकर्मीको पनि साथ र सहयोग आवश्यक रहेको बागमती सेवा समाज नेपालका क्षयरोग कार्यक्रम संयोजक अजमद अलि मिकरानीले बताए।

उहाँका अनुसार हरिवन नगरपालिकालाई क्षयरोग मुक्त नगरपालिका र क्षयरोग र क्षयरोगीको पहिचान तथा उपचार गर्नका लागि प्राविधिकरुपमा हरिवनमा रहेको बागमती सेवा समाज नेपालले विगत पाँच वर्षदेखि सहयोग पुर्‍याउँदै आएको छ।

नगरको स्वास्थ्य तथा सामाजिक विकास शाखाको आयोजनामा भएको पालिकास्तरीय क्षयरोग तथा कुष्ठरोगको वार्षिक नतिजा विश्लेषण कार्यक्रममा सहभागीले नगरपालिकालाई क्षयरोगमुक्त पालिक बनाउन सामुदायिक स्वास्थ्यकर्मीले मात्रै सम्भव नरहेको बताएका छन्।

मधेश प्रदेशका  हरिवन र निजगढ नगरपालिका तथा लक्ष्मीनियाँ गाउँपालिकालाई नेपाल सरकारले सन् २०३५ सम्ममा दिगो विकासको लक्ष्य हासिल गर्ने उद्देश्यअनुरूप पहिलो चरणमा क्षयरोगमुक्त पालिका घोषणा गर्ने लक्ष्य लिएको छ,जसअनुसार २०७८ सालबाट यो स्थानीय तहमा क्षयरोगमुक्त अभियान घोषणा गरिएको छ ।

प्रत्येक एक लाख जनसङ्ख्यामा २४५ जनामा क्षयरोग देखा पर्ने गरेको विश्व स्वास्थ्य संगठन (डब्लूएचओ)को तथ्यांकमा उल्लेख छ।