काठमाडौं – नेपाली कला साहित्य डटकम प्रतिष्ठानको आयोजनामा एनएलजी विशेष शान्ति कविता राजधानीस्थीत नेपाल टुरिज्म बोर्डमा सम्पन्न भएको छ।
उक्त गोष्ठीमा कवि डा नवराज लम्साल, फूलमान वल, लक्ष्मी माली, लक्ष्मण गाम्नागे, बिन्दु शर्मा, राधिका कल्पित, अमरदीप सुनुवार, बाबु त्रिपाठी, लक्ष्मी रूम्बा, सुवास सजल, रन्जना निरौला, विश्व सिग्देल, प्रदीप भट्टराई, तारा सुनुवार, कपिल अन्जानका सारगर्वित कविता सुनिएको थियो।
नेपाली कला साहित्य डटकमकी अध्यक्ष विशिष्ट निबन्धकार मोमिला जोशीको अध्यक्षतामा सम्पन्न भएको उक्त गोष्ठीमा प्रमुख अतिथि संस्कृतिविद् तुलसी दिवस थिए। विशेष अतिथिका रूपमा डाक्टर बिमल कोइराला रहँदा अतिथिका रूपमा एनएलजि इन्स्योरेन्स कम्पनीका सीईओ सुनिल बल्लभ पन्त उपस्थित थिए।
सोही अवसरमा कलाश्री साहित्यिक पत्रीकाको वार्षिक अंकको विमोचन समेत गरिएको छ। कवि मणि लोहनीले संचालन गरेको उक्त कार्यक्रममा राजुबाबु श्रेष्ठ कलाश्री सम्मानबाट पुरस्कृत भएका थिए।
कविता, निबन्ध र समालोचनामा कलम चलाउने मोमिलाको अग्रसरतामा यस्ता विभिन्न कार्यक्रमहरू वर्षेनी हुँदै आएका छन्। मोमिलाले आधा दर्जनजति पुस्तकका सम्पादन पनि गरेकी छिन् भने दुई दर्जनभन्दा बढी पुरस्कारले सम्मानित मोमिला आधा दर्जन बढी संघसंस्थामा आबद्ध छिन्।
कलासाहित्य डटकम प्रतिष्ठानको सक्रिय अध्यक्षता निभाउँदै उनले नेपाली कला साहित्य यात्रामार्फत् देश तथा विदेशमा नेपालीसाहित्यको आवाज सम्प्रेषण गर्न महत्त्वपूर्ण भूमिका खेल्दै आएकी छिन्।
