इलाममा १९ र बझाङमा ११ जनाबीच प्रतिस्पर्धा

निर्धक्क भएर मतदानमा सहभागी हुन निर्वाचन आयोगको आग्रह

काठमाडौं । उपनिर्वाचन अन्तर्गत इलाम प्रतिनिधिसभा-२ र बझाङ प्रदेश सभा -१ मा मतदान सुरु भएको छ ।बिहान सात बजेबाट मतदान सुरु भएको इलामका मुख्य निर्वाचन अधिकृत केशवप्रसाद घिमिरेले बताउनुभयो । उहाँले मतदाताहरु उत्साहित रुपमा मतदानमा सहभागी हुने क्रम सुरु भएको पनि जानकारी दिनुभयो ।

इलाम-२ मा ४२ वटा वडामा मतदान हुनेछ । जसमा ७९ वटा मतदान स्थल, १ सय ४९ वटा मतदान केन्द्र रहेका छन् । मतदान सहज बनाउन ७ सय ४५ जना कर्मचारी खटिएका छन् । त्यस्तै इलाममा १ लाख १५ हजार ८ सय ८९ मतदाता छन् । यी मतदातामध्ये ४ सय २२ जना नयाँ मतदाता थपिएका हुन् । सबै मतदाताहरुलाई पुग्ने गरी निर्वाचनका सामग्रीको व्यवस्था गरिएको छ । मुख्य निर्वाचन अधिकृत घिमिरेले मतदातालाई निर्भिकतापूर्वक मतदान गर्न पाउने व्यवस्था मिलाएको र सुरक्षित किसिमबाट मतपेटिका गणनास्थलमा लैजाने बताउनुभयो ।

पुरुष तथा महिलाका लागि अलग-अलग लाइनमा बसेर मतदान गर्न सक्नेगरी व्यवस्थापन गरिएको छ । मतदान केन्द्रहरूको नेपाली सेनाको हवाई गस्तीको प्रबन्ध पनि मिलाइएको छ । मुख्य निर्वाचन अधिकृतको कार्यालयका अनुसार इलाम-२ बाट प्रतिनिधि सभा सदस्यका लागि १९ जना उम्मेदवार चुनावी मैदानमा छन् ।

यसैगरि बझाङ -१ को उपनिर्वाचनको लागि पनि मतदान सुरु भएको छ । बझाङ -१मा मतदानका लागि ७४ मतदान स्थलमा ९३ वटै मतदान केन्द्रमा मतदाता उत्साहित रूपमा सहभागी भएको मुख्य निर्वाचन अधिकृतको कार्यालय बझाङका सूचना अधिकारी प्रकाशबहादुर सिंहले बताउनुभयो । मतदान केन्द्र र मतदाताको सुरक्षाका लागि एक हजार पाँच सयबढी सुरक्षाकर्मीहरु परिचालन गरिएको बझाङका प्रमुख जिल्ला अधिकारी विश्वामित्र कुइकेलले बताउनुभयो ।