काठमाडौं –अमेरिका सरकारले बिहीबार वैश्विक आर्थिक मञ्चलाई नयाँ स्वरूप दिने प्रयासस्वरूप आगामी जी–२० सम्मेलन आयोजना गर्ने घोषणा गरेको छ । अमेरिकाले यसलाई ‘नयाँ जी–२०’ भनेको छ । अमेरिकाले यो सम्मेलनबाट दक्षिण अफ्रिकालाई बाहिर निकालेर पोल्यान्डलाई भित्र्याउने जनाएको छ ।
अमेरिकी विदेशमन्त्रीले दक्षिण अफ्रिकामाथि भेदभाव र कट्टरपन्थी एजेन्डालाई बढावा दिएको आरोप लगाएका छन् । नयाँ जी–२० सन् २०२६ डिसेम्बरमा फ्लोरिडाको मियामीमा हुनेछ । सन् २००९ पछि अमेरिकाले पहिलोपटक जी–२० को आयोजना गर्न लागेको हो ।
नयाँ जी–२० तीन मुख्य स्तम्भमा आधारित हुने बताइएको छ । सम्मेलन नियामक बोझ हटाउने, सुलभ र सुरक्षित ऊर्जा आपूर्ति श्रृंखला सुनिश्चित गर्ने र एआईजस्ता महत्त्वपूर्ण प्रविधिमा ध्यान केन्द्रित गर्ने विषयमा केन्द्रित हुनेछ ।
मार्को रुबियो ले पोल्यान्डलाई पनि जी–२० सम्मेलनमा समावेश गर्ने जानकारी दिए । उनले दक्षिण अफ्रिकाको अफ्रिकन नेसनल कंग्रेसको नेतृत्वको सरकारको कडा आलोचना गर्दै त्यहाँ मानवअधिकार उल्लंघनका घटनाहरूबाट आँखा चिम्लिएको आरोप लगाए ।
ट्रम्प प्रशासनले दक्षिण अफ्रिकाका सिरिल रामाफोसा सरकारको निन्दा गरेको यो पहिलोपटक होइन । ट्रम्पले केही दिनअघि २०२६ मा हुने जी–२० सम्मेलनबाट दक्षिण अफ्रिकालाई सामेल नगर्ने बताएका थिए ।
राष्ट्रपति रामाफोसाले डोनाल्ड ट्रम्पको निर्णय निराशाजनक भएको बताएका छन् ।
अमेरिकी राष्ट्रपति ट्रम्पले प्रमाणबिनै दक्षिण अफ्रिकामा श्वेत किसानमाथि नरसंहार भएको आरोप लगाएपछि यी दुवै देशबीचको सम्बन्धमा चिसो देखिएको छ ।
यही असन्तुष्टिका कारण ट्रम्पले दक्षिण अफ्रिकाको अध्यक्षतामा भएको हालैको जी–२० सम्मेलनमा भाग लिन अस्वीकार गरे । यसै विवादका बीच, दक्षिण अफ्रिकाले जी–२० को अध्यक्षताको ‘ग्याभेल’ अमेरिकी दूतावासका कनिष्ठ अधिकारीलाई सुम्पिन अस्वीकार गरेसँगै अमेरिका रुष्ट भयो ।
