माघ १८ गते श्री स्वस्थानी पूर्णिमाका दिन गार्गी कन्या गुरुकुलको सभाकक्षमा ‘अङ्गुरबाबा जोशी महाकाव्य’को लोकार्पण कार्यक्रम सम्पन्न गरिएको छ।
यस कार्यक्रममा गलेश्वर आश्रमका पीठाधीश महामण्डलेश्वर स्वामी आत्मानन्द गिरिज्यू र महेश सन्यास आश्रमका पीठाधीश स्वामी रमणानन्द गिरिजूको कृपापूर्ण समुपस्थिति थियो । भरतपुर महानगरका प्रमुख चित्रसेन अधिकारीको प्रमुख आतिथ्य एवं प्रशासकीय अधिकृत वीरेन्द्र भारतीको विशिष्ट आतिथ्यमा सम्पन्न यस कार्यक्रममा गार्गी कन्या गुरुकुल प्रतिष्ठानका अध्यक्ष शान्तप्रसाद पोखरेलज्यू सभापति हुनुहुन्थ्यो ।
कार्यक्रममा गुरुकुलका संस्थापक एवं प्रमुख संरक्षक दानवीर आमा भगवती उपाध्याय ज्यू, संरक्षक प्रा. डा. गुरुप्रसाद सुवेदी ज्यू, संरक्षक भगवती काफ्ले ज्यू विशिष्ट गण्य मान्य समाजसेवी महानुभाव, कवि साहित्यकार र गुरुकुलका आजीवन सदस्यज्यूहरूको समुपस्थिति थियो ।
अङ्गुर बाबा जोशी महिला सशक्तीकरणक अभियन्ता सुप्रसिद्ध विदुषी एवं यस गार्गी गुरुकुलका संस्थापक हुनुहुन्थ्यो । उहाँको सशक्त व्यक्तित्वलाई प्रकाशित गर्ने उद्देश्यले संस्थाका कोषाध्यक्ष निर्मला पोखरेलको प्रेरणाले प्रसिद्ध कवि हीरालाल कण्डेलद्वारा रचित यस महाकाव्यको उपप्राध्यापक ज्ञाननिष्ठ ज्ञवालीले समीक्षा गर्नुभएको थियो ।
गुरुकुलका कन्याहरूको वैदिक मङ्गलाचरणबाट शुरु भएको कार्यक्रममा प्राचार्य गोदा सुवेदीद्वारा स्वागत मन्तव्य प्रस्तुत भएको थियो भने गुरुकुलका कन्याहरूले राष्ट्रभक्तिपरक गीत, संस्कृतमा भाषण र आफ्ना कविता समेत प्रस्तुत गर्नुभएको थियो । अन्त्यमा सभापतिबाट अतिथिज्यूहरूलाई मायाको चिनो द्वारा सम्मान गर्नुभयो र आफ्नो मन्तव्यमा सबैप्रति आभार र धन्यवाद व्यक्त गर्दै कार्यक्रम समापन गर्नुभयो।
