काठमाडौं – फिफा अध्यक्ष जियानी इन्फान्टिनोमाथि युइएफएको महासचिव रहँदा एक महिला कर्मचारीलाई गरिएको ठूलो रकमको ‘बहिर्गमन भुक्तानी’सँग जोडेर उठाइएको आरोपले विश्व फुटबलमा नयाँ विवाद निम्त्याएको छ। इन्फान्टिनोले भने आफूविरुद्ध लगाइएका आरोपलाई पूर्ण रूपमा अस्वीकार गरेका छन्।
बेलायती पत्रिका द टेलिग्राफले इन्फान्टिनो सन् २००९ देखि २०१६ सम्म युइएफएको महासचिव रहँदा एक जुनियर महिला कर्मचारीसँग कथित सम्बन्ध रहेको र पछि ती कर्मचारीलाई युइएफएबाट बाहिरिँदा छ अंकको रकमसहितको ‘डिपार्चर प्याकेज’ दिइएको दाबी गरेको छ। रिपोर्टमा ती महिलाको नाम भने सार्वजनिक गरिएको छैन।
फिफाका प्रवक्ताले द टेलिग्राफलाई दिएको प्रतिक्रियामा इन्फान्टिनोले आरोपलाई ‘पूर्ण रूपमा असत्य’ भन्दै अस्वीकार गरेको बताएका छन्। फिफाले कुनै अनुचित व्यवहार वा नियम उल्लङ्घन भएको आशङ्का गर्नु भ्रामक र चरित्रहत्या गर्ने प्रयास भएको जनाएको छ।
युइएफएले भुक्तानी भएको पुष्टि गर्यो
युइएफएले भने सम्बन्धित महिला कर्मचारीलाई बहिर्गमन भुक्तानी गरिएको पुष्टि गरेको छ। संस्थाका अनुसार त्यसमा उनको एमबिए अध्ययनको शुल्कसमेत समावेश थियो।
युइएफएको भनाइमा उक्त भुक्तानी तत्कालीन कर्मचारीसम्बन्धी नियमअनुसार नै गरिएको थियो। यद्यपि, सन् २०१६ पछि यस्ता प्रावधानलाई थप कडा बनाइएको र अहिलेका कर्मचारी नियम आधुनिक संस्थागत मापदण्डअनुसार रहेको युइएफएले जनाएको छ।
युइएफएले भुक्तानी भएको स्वीकार गरे पनि त्यसलाई इन्फान्टिनोसँग कथित व्यक्तिगत सम्बन्धका कारण गरिएको भुक्तानीका रूपमा पुष्टि गरेको छैन।
फिफा र इन्फान्टिनोमाथि बढ्दो दबाब
यो प्रकरण इन्फान्टिनोको नेतृत्वमाथि दबाब बढिरहेका बेला सार्वजनिक भएको हो। पछिल्लो समय फिफाका केही विश्वकप तथा व्यावसायिक अधिकार बिक्री गर्ने योजनालाई लिएर युरोपेली फुटबल वृत्तमा तीव्र असन्तुष्टि देखिएको छ।
युइएफएका सदस्य संघहरूले इन्फान्टिनोको नेतृत्वप्रति विश्वास गुमेको बताएका छन्। प्रस्तावित बिक्री योजनाहरू फिर्ता भए पनि भविष्यमा यस्ता प्रयास दोहोरिन नदिने स्पष्ट ग्यारेन्टी आवश्यक रहेको युइएफएको अडान छ।
युइएफएले आवश्यक अवस्था आए फिफाका प्रतियोगितामा सहभागिताबारे समेत कडा कदम चाल्न सक्ने संकेत दिएको छ।
फिफाको ‘संगठित प्रयास’ आरोप
शनिबार फिफाले छुट्टै वक्तव्य जारी गर्दै संस्था र आफ्ना अध्यक्षलाई कमजोर पार्ने ‘संगठित र निरन्तर प्रयास’ भइरहेको आरोप लगाएको छ।
फिफाले वैध छानबिन वा समीक्षाको स्वागत गर्ने बताउँदै आरोप, आशङ्का वा भ्रामक सूचनाका आधारमा संस्थाको लोकतान्त्रिक प्रक्रिया र सुशासनलाई कमजोर पार्ने प्रयास स्वीकार्य नहुने जनाएको छ। गलत वा भ्रामक रिपोर्टिङ भए त्यसको प्रतिवाद गर्ने चेतावनीसमेत फिफाले दिएको छ।
युइएफएसँग टकराव, अन्य महादेशीय संघको समर्थन
इन्फान्टिनोको नेतृत्वलाई लिएर फिफाभित्रै पनि मतभेद देखिन थालेको छ। युइएफएले आफ्नो असन्तुष्टि कायमै राखेको छ भने दक्षिण अमेरिकी फुटबल महासंघ कन्मेबोलले तत्काल विशेष कंग्रेस बोलाएर इन्फान्टिनोको भविष्यबारे निर्णय गर्ने पक्षमा नरहेको जनाएको छ।
अफ्रिकी फुटबल महासंघले भने इन्फान्टिनोप्रति समर्थन जनाएको छ। यसले फिफाभित्र इन्फान्टिनोको नेतृत्वलाई लिएर महादेशीय फुटबल संघहरूबीच फरक–फरक धारणा रहेको देखाएको छ।
यसैबीच, खेलाडीहरूको अन्तर्राष्ट्रिय संगठन फिफप्रोले पनि फिफाको नेतृत्वप्रतिको विश्वास कमजोर भएको जनाएको छ।
नयाँ आरोप र युइएफए–फिफाबीचको बढ्दो दूरीका कारण इन्फान्टिनोको नेतृत्वमाथिको राजनीतिक दबाब थप बढेको छ। यद्यपि, ‘बहिर्गमन भुक्तानी’ प्रकरणमा इन्फान्टिनोको कथित व्यक्तिगत सम्बन्ध वा अनुचित व्यवहार भएको विषय भने हालसम्म आरोप र प्रतिवादकै तहमा रहेको छ।
Discussion about this post