४अषाढ, काठमाडौँ, नगेन्द्र न्यौपानेको नियात्रा कृति ‘बर्मा र थाइल्यान्डभित्र नेपाल’ शनिबार लोकार्पण गरियो ।
लेखक नियात्राकार न्यौपाने अमेरिकामा नै हुनुहुन्छ र पनि उहाँको कृति नेपालमा विमोचित गरिएको हो ।
नियात्रा समाज नेपालको संयोजकत्वमा सो पुस्तकको लोकार्पण गरिएको हो । कार्यक्रममा नियात्रा समाजका अध्यक्ष प्रतीक ढकाल, नियात्राकार युवराज नयाँघरे, शङ्कर लामिछाने प्रतिष्ठानका अध्यक्ष राधेश्याम लेकाली, पुस्तकका प्रकाशक बिएन पुस्तक संसारका सूर्य बिसी, नियात्राकारहरू मोहन चापागाईं, गीता रेग्मी, खेमराज पोखरेल, अनुपम रोशी, शर्मिला खड्का दाहाल लगायतका स्रष्टाहरूको सो अवसरमा उपस्थित हुनुहुन्थ्यो । उहाँहरूले पुस्तकको सफलताको कामना गर्नुभयो ।
नियात्राकार न्यौपानेका यसअघि प्रकाशित “यात्राको बङ्लादेश” र “कङ्गो र इथियोपियाको सेरोफेरो” पाठकवर्गका बीच निकै लोकप्रिय छन् । समारोहको सञ्चालन रेडियो नेपालकी कार्यक्रम प्रस्तोता यशोदा अधिकारीले गर्नुभएको थियो ।
