सर्लाही – नेपाली कांग्रेसका सभापति गगनकुमार थापाले देश निर्माण कुनै एक व्यक्तिको प्रयासबाट सम्भव नहुने बताएका छन्। लोकतन्त्रको सार नै सामूहिकता र सहकार्य भएको उल्लेख गर्दै उनले सबै राजनीतिक दल, समुदाय र नागरिकको संयुक्त प्रतिबद्धताबाट मात्रै समृद्ध नेपाल निर्माण सम्भव हुने बताएका हुन्।
सर्लाही निर्वाचन क्षेत्र नं ४ अन्तर्गत बुधबार साँझ धन्कौलमा आयोजित मतदातासँगको भेटघाट कार्यक्रममा बोल्दै सभापति थापाले आफू मधेशबाट देश जोड्ने सन्देश दिन यहाँ आएको बताए। उनले मधेशलाई केन्द्रमा राखेर राष्ट्रिय एकताको नयाँ अध्याय सुरु गर्नुपर्ने आवश्यकता औँल्याए।
उनले भने, “देश एक्लैले बनाउने होइन। यो सामूहिक प्रयास र सङ्कल्पबाट मात्रै सम्भव हुन्छ। एउटा व्यक्तिले देश बनाउने भए पहिले नै राजा–महाराजाले बनाइसक्ने थिए। तर देश जनताको सहभागिताबाट बन्छ, सहकार्यबाट बन्छ, सबैलाई साथ लिएर अघि बढ्दा मात्र बन्छ। त्यसैले अब देशमा रहेका सबै दललाई मिलाएर परिवर्तनका लागि हातेमालो गर्नुपर्छ। त्यसको भूमिका मेरो पार्टी र मैले पूरा गर्नेछु।”
थापाले वर्तमान राजनीतिक परिस्थितिमा दलहरूबीच आपसी अविश्वास र आरोप–प्रत्यारोपको प्रवृत्ति बढ्दै गएकोप्रति चिन्ता व्यक्त गरे। उनले लोकतन्त्रलाई बलियो बनाउन सहकार्यको संस्कार आवश्यक रहेको बताए। “हामीले प्रतिस्पर्धा गर्नुपर्छ, तर द्वन्द्व होइन। बहस गर्नुपर्छ, तर विद्वेष होइन। लोकतन्त्रमा फरक विचार स्वाभाविक हो, तर देश र जनताको हितभन्दा ठूलो कुनै स्वार्थ हुन सक्दैन,” उनले भने।
सभापति थापाले आफू निर्वाचन क्षेत्र नपाएर सर्लाही आएको नभई जानाजानी मधेश रोजेर आएको स्पष्ट पारे। उनले काठमाडौँ क्षेत्र नं ४ जस्तो आफ्नो बलियो जनाधार रहेको क्षेत्र छाडेर सर्लाही आउनु आफ्नो राजनीतिक प्रतिबद्धता र दृष्टिकोणको संकेत भएको बताए।
“म सजिलो बाटो रोज्न चाहेको भए काठमाडौँमै सुरक्षित क्षेत्र थियो। तर म चुनौती स्वीकार गरेर यहाँ आएको छु। मलाई अझ बढी मधेश बुझ्नु छ, यहाँको पीडा बुझ्नु छ। यहाँका समस्याबारे धेरै कुरा उठिसकेका छन्। तर अब समाधानका लागि काम गर्ने समय आएको छ,” उनले भने।
उनले मधेशले विगतमा भोगेका राजनीतिक, आर्थिक र सामाजिक उपेक्षाका विषय उल्लेख गर्दै अब त्यसको अन्त्य हुनुपर्ने धारणा राखे। “मधेशको विकास बिना नेपालको विकास अधूरो हुन्छ। मधेशको सम्मान बिना राष्ट्रिय एकता बलियो हुँदैन। त्यसैले यहाँका नागरिकको भरोसा जितेर काम गर्न चाहन्छु,” उनले थपे।
थापाले आफ्नो पार्टीले विश्वास गरेर आफूलाई प्रधानमन्त्रीका लागि अगाडि सारेको उल्लेख गर्दै देशभरबाट समर्थन प्राप्त हुनेमा आफू विश्वस्त रहेको बताए। उनले प्रधानमन्त्री बन्ने वा नबन्नेभन्दा पनि जनताको विश्वास जितेर सेवा गर्ने आफ्नो प्राथमिकता भएको स्पष्ट पारे।
“प्रधानमन्त्री बन्ने कुरा दल र संसद्को निर्णय हो। तर जनताको सेवा गर्ने जिम्मेवारी चुनाव जितेपछि तत्काल सुरु हुन्छ। मलाई प्रधानमन्त्रीको जिम्मेवारी नपाए पनि सर्लाही क्षेत्र नं ४ को विकासमा प्रतिबद्ध भएर काम गर्नेछु,” उनले भने।
उनले आफूलाई नेता वा माननीयको रूपमा नभई परिवारको सदस्यका रूपमा हेर्न आग्रह गरे। “मलाई कसैले ठूलो नेता भनेर हेर्नुपर्ने छैन। यहाँहरूले मलाई आफ्नै दाइ, भाइ, छोरा वा साथी भनेर बुझिदिनु हुन्छ। म पाँच वर्षका लागि यहाँहरूको परिवारको सदस्य हुन आएको छु,” उनले भने।
सभापति थापाले विकासका योजना कागजमा सीमित नराखी व्यवहारमा उतार्ने प्रतिबद्धता जनाए। उनले सर्लाही–४ र काठमाडौँ दुवै ठाउँमा कार्यालय सञ्चालन गर्ने जानकारी दिँदै नागरिकसँग निरन्तर सम्पर्कमा रहने बताए। “अहिले मैले मत मागे जसरी पछि यहाँका नागरिकले मसँग हक माग्ने हो। जनताको हकको सम्मान गर्नु नै सच्चा राजनीति हो,” उनले जोड दिए।
कार्यक्रममा उपस्थित स्थानीय बासिन्दाले कृषि, सिँचाइ, सडक, शिक्षा, स्वास्थ्य र रोजगारीका समस्या उठाएका थिए। किसानहरूले मल–बीउको अभाव, उत्पादनको उचित मूल्य नपाउने समस्या र सिँचाइ पूर्वाधारको कमजोरीबारे गुनासो गरे। युवाहरूले रोजगारीका अवसर नहुँदा वैदेशिक रोजगारीमा जान बाध्य भएको विषय उठाए।
थापाले यी समस्याहरू समाधानका लागि दीर्घकालीन नीति आवश्यक रहेको बताए। उनले कृषि आधुनिकीकरण, साना तथा मझौला उद्योगको प्रवर्द्धन, प्राविधिक शिक्षामा लगानी र स्थानीय पूर्वाधार विकासलाई प्राथमिकतामा राख्ने प्रतिबद्धता व्यक्त गरे।
“हामीले कृषि क्षेत्रमा उत्पादन बढाउने मात्रै होइन, बजार सुनिश्चित गर्ने नीति ल्याउनुपर्छ। किसानलाई लागतभन्दा कम मूल्यमा उत्पादन बेच्नुपर्ने अवस्था अन्त्य गर्नुपर्छ। युवालाई आफ्नै गाउँमा अवसर सिर्जना गर्न सक्ने वातावरण बनाउनु पर्छ,” उनले भने।
उनले शिक्षा र स्वास्थ्य क्षेत्रमा सुधार बिना विकास सम्भव नहुने उल्लेख गरे। “गाउँमै गुणस्तरीय विद्यालय र स्वास्थ्य सेवा उपलब्ध हुनुपर्छ। नागरिकलाई सामान्य उपचारका लागि पनि राजधानी धाउनुपर्ने अवस्था अन्त्य गर्नुपर्छ,” उनले भने।
सभापति थापाले सुशासनलाई आफ्नो प्रमुख एजेन्डा बनाउने बताए। उनले भ्रष्टाचारविरुद्ध कडा कदम चाल्ने प्रतिबद्धता व्यक्त गर्दै पारदर्शिता र जवाफदेहितालाई सुदृढ बनाउने धारणा राखे। “जनताको करबाट चल्ने सरकार जनताप्रति उत्तरदायी हुनुपर्छ। राज्य संयन्त्रलाई जनमुखी बनाउनु पर्छ,” उनले भने।
उनले मधेश र पहाडबीचको दूरी मनोवैज्ञानिक रूपमा पनि घटाउनुपर्ने धारणा राखे। “हामी सबै नेपाली हौं। भाषा, संस्कृति र भौगोलिक विविधता हाम्रो शक्ति हो। विभाजन होइन, एकताको भावना बलियो बनाउनुपर्छ,” उनले भने।
कार्यक्रममा स्थानीय नेता तथा कार्यकर्ताले सभापति थापाको उम्मेदवारीलाई ऐतिहासिक अवसरको रूपमा चित्रण गरे। उनीहरूले सर्लाही–४ को विकासका लागि स्पष्ट दृष्टिकोणसहितको नेतृत्व आवश्यक रहेको बताएका थिए।
अन्त्यमा थापाले मतदातासँग भावनात्मक अपिल गर्दै विश्वासका साथ मतदान गर्न आग्रह गरे। “म यहाँ केवल चुनाव जित्न आएको होइन, सर्वका साथ भन्न सक्नुहोस्—हामीले विश्वास गरेको व्यक्ति हाम्रो साथमा उभियो,” उनले भने।
उनको सम्बोधनले उपस्थित भीडमा उत्साह देखिएको थियो। कार्यक्रमपछि उनले स्थानीय बासिन्दासँग हातेमालो गर्दै व्यक्तिगत रूपमा गुनासा सुनेका थिए।
सर्लाही–४ मा सभापति थापाको सक्रियता र मधेशबाट राष्ट्रिय सन्देश दिने उनको रणनीतिले आगामी निर्वाचनमा नयाँ राजनीतिक समीकरण र बहसलाई जन्म दिएको छ। अब मतदाताले उनको प्रतिबद्धतालाई कति विश्वास गर्छन्, त्यो भने चुनावी परिणामले स्पष्ट पार्नेछ।
