काठमाडौं –बंगलादेशमा यही फेब्रुअरी १२ मा संसदीय चुनाव हुँदै छ । पूर्वप्रधानमन्त्री शेख हसिनाले देश छाडेको र खालिदा जियाको निधनपछि हुन लागेको यो पहिलो चुनाव हो । सन् १९९१ देखि २०२४ सम्म बंगलादेशको राजनीतिमा यी दुई नेताको दबदबा थियो ।
यसरी ३५ वर्षपछि बंगलादेशमा नयाँ प्रधानमन्त्री चुनिनेछन् । शेख हसिनाको अवामी लिगलाई यो चुनावमा भाग लिन अनुमति दिइएको छैन । सन् २०२४ मा विद्यार्थी आन्दोलनका क्रममा भएको हिंसामा पार्टीको भूमिकाका कारण यस्तो निर्णय गरिएको त्यहाँको निर्वाचन आयोगले जनाएको छ ।
बंगलादेशको यो चुनावले देशको राजनीति मात्र नभई सम्पूर्ण दक्षिण एसियाको कूटनीति र शक्ति सन्तुलन बदल्न सक्ने विज्ञलाई उद्धृत गर्दै अलजजिराले जनाएको छ ।
त्यसैले भारत, पाकिस्तान र चीनले पनि यो चुनावलाई नजिकबाट नियालिरहेका छन् ।
सन् २०२४ अगस्टदेखि बंगलादेशमा नोबेल पुरस्कार विजेता मोहम्मद युनुस नेतृत्वको अन्तरिम सरकार छ ।
हसिनालाई सत्ताबाट हटाइएपछि बंगलादेशको विदेश नीतिमा ठूलो परिवर्तन आएको छ । भारतसँगको सम्बन्ध हाल सबैभन्दा निम्नस्तरमा पुगेको छ । पाकिस्तानसँग सम्बन्ध सुधारिएको छ । चीनसँग रणनीतिक सम्बन्ध झन् मजबुत बनेको छ ।
