बिल गेट्सको निजी कार्यालयका लागि अन्तर्वार्ता दिन आएका महिलालाई व्यक्तिगत र यौन जीवनका बारेमा धेरै प्रश्न सोधियो

न्युयोर्क । विश्वका धनी व्यक्ति र माइक्रोसफ्टका सह-संस्थापक बिल गेट्सको कार्यालयबारे एउटा चकित पार्ने खुलासा भएको छ । वाल स्ट्रिट जर्नलको रिपोर्टका अनुसार बिल गेट्सको निजी कार्यालयका लागि अन्तर्वार्ताका क्रममा महिलाहरूलाई उनीहरूको व्यक्तिगत जीवन, यौन जीवनका बारेमा धेरै प्रश्न सोधिएको थियो ।

बिल गेट्सको अफिसमा अन्तर्वार्ता दिन आएका महिला उम्मेदवारले अन्तर्वार्ताका क्रममा यौन गतिविधि, उनीहरूको पोर्नोग्राफी बानी, विवाह, बाह्य सम्बन्ध, यौन इतिहासलगायतका धेरै अचम्मका प्रश्न सोधिएको बताए ।

मिडिया रिपोर्टका अनुसार यो अन्तर्वार्ता बिल गेट्सको निजी कार्यालय गेट्स भेन्चर्समा काम गर्ने महिलाका लागि लिइएको हो । तर, यी प्रश्नका सम्बन्धमा बिल गेट्सका प्रवक्ताले अन्तर्वार्ताका क्रममा सोधिएका यस्ता प्रश्नबारे आफूलाई कुनै जानकारी नभएको बताए । उनले उम्मेदवारलाई तेस्रो पक्षले सोधेका प्रश्नबारे आफूलाई जानकारी नभएको स्पष्ट पार्दै सबै आरोप खारेज गरे

यति मात्र होइन, यदि यी प्रश्नहरू सोधिएको हो भने त्यो गेट्स भेन्चर्सको सम्झौताको विरुद्धमा रहेको उनले बताए । जानकारीका अनुसार यी अन्तर्वार्ता सुरक्षा परामर्श फर्म कन्सेन्ट्रिक एडभाइजर्सले हालै लिएका हुन् ।

अन्तर्वार्ता लिने महिलाले व्यक्तिगत जीवन, विवाहेतर सम्बन्ध, अश्लील बानीका अलावा फोनमा आफ्ना नग्न तस्बिर छ कि छैन ? भनेर पनि सोधेको बताइएको छ ।