काठमाडौँ– बीवाईडी यस वर्ष बिक्रीको आधारमा विश्वको सबैभन्दा ठूलो ईभी कम्पनी बन्दैछ। टेस्लाले सन् २०२५ को सुरुदेखि सेप्टेम्बरको अन्त्यसम्म १२ लाख २० हजार मात्र ईभी बिक्री गरेको थियो। अमेरिकी कर सुविधा हटाएपछि टेस्लाको चौथो त्रैमासिक बिक्री घट्ने अनुमान छ।
चीन । चिनियाँ विद्युतीय सवारी साधन (ईभी) निर्माता कम्पनी बीवाईडी यस वर्ष बिक्रीको आधारमा विश्वको सबैभन्दा ठूलो ईभी कम्पनी बन्दैछ । उपलब्ध तथ्याङ्कअनुसार अमेरिकी प्रतिस्पर्धी टेस्लाले यस वर्ष विश्व ईभी बजारमा आफ्नो वर्चस्व कायम राख्न नसक्ने देखिएको छ ।
यस वर्षको सुरुदेखि नोभेम्बरको अन्त्यसम्म बीवाईडीले विश्वभर २० लाख ७ हजारभन्दा बढी ईभी बिक्री गरेको छ । कम्पनीले हाइब्रिड सवारी साधनहरू पनि उत्पादन तथा बिक्री गर्दै आएको छ, जसका कारण समग्र बिक्री अझ बढेको हो ।
अर्कोतर्फ, सन् २०२५ को सुरुदेखि सेप्टेम्बरको अन्त्यसम्म टेस्लाले १२ लाख २० हजार मात्र ईभी बिक्री गरेको थियो । बाँकी अवधिमा बीवाईडीसँगको बिक्री अन्तर पूरा गर्नु टेस्लाका लागि प्रायः असम्भव देखिएको छ ।
सेप्टेम्बरमा भने टेस्लाले बिक्रीमा असाधारण वृद्धि देखाएको थियो । तीन महिनामा कम्पनीले झन्डै पाँच लाख ईभी बिक्री गरेको थियो । यो वृद्धि अमेरिकामा ईभी खरिदमा उपलब्ध कर क्रेडिटको म्याद सकिनुअघि भएको हो । तर हाल अमेरिकी राष्ट्रपति डोनल्ड ट्रम्पले उक्त कर सुविधा हटाएका छन् ।
डेटा विश्लेषण कम्पनी फ्याक्टसेटका अनुसार टेस्लाको चौथो त्रैमासिक बिक्री ४ लाख ४९ हजारमा झर्न सक्ने अनुमान गरिएको छ । यसअनुसार सन् २०२५ मा टेस्लाको कुल बिक्री करिब १६ लाख ५० हजारमा सीमित हुने देखिन्छ, जुन अघिल्लो वर्षको तुलनामा ७ दशमलव ७ प्रतिशतले कम हो । यो संख्या नोभेम्बरसम्म बीवाईडीले बिक्री गरेको ईभीको तुलनामा निकै कम हुनेछ । एजेन्सी
