काठमाडौँ- जापानी प्रधानमन्त्री सानाई ताकाइचीले ताइबानबारे दिएको टिप्पणीपछि टोकियो र बेइजिङबिच सुरु भएको कूटनीतिक विवाद थप गहिरिँदै गएको छ । यसबिच चीनले जापानी समुद्री खाना (सी–फुड)को सबै आयातमा पुन: प्रतिबन्ध लगाएको जापानी मिडियाले लेखेका छन् ।
जापानी सरकारी प्रसारक एनएचके र क्योडो समाचार एजेन्सीका अनुसार चीनले यसअघि लगाएको जापानी सी–फुडमाथिको प्रतिबन्ध यसै महिनाको सुरुमा मात्र हटाइएको थियो । सन् २०२३ मा जापानको क्षतिग्रस्त फुकुसिमा आणविक संयन्त्रबाट प्रशोधित रेडियोधर्मी पानी समुद्रमा छाडेपछि बेइजिङले जापानी सी–फुडमाथि प्रतिबन्ध लगाएको थियो ।
यस विषयमा जानकार स्रोतलाई उद्धृत गर्दै क्योडो समाचारले लेखेअनुसार चीनले जापानी अधिकारीसँग सम्पर्क गरेर फुकुसिमाबाट प्रशान्त महासागरमा छोडिएको पानीको थप छानबिन गर्न आवश्यक भएकाले पुन: प्रतिबन्ध लगाउनुपरेको जानकारी दिएको छ । आधिकारिक तथ्यांकअनुसार जापानको सी–फुडको कुल निर्यातको २० प्रतिशत हिस्सा चीन एक्लैले खरिद गर्छ ।
जापानी प्रधानमन्त्री ताकाइचीले नोभेम्बर ७ मा संसद्लाई सम्बोधन गर्ने क्रममा ताइबानमा चिनियाँ आक्रमण भए टोकियोले सैन्य प्रतिक्रिया जनाउन सक्ने बताएकी थिइन् । ताकाइचीको टिप्पणीप्रति चिनियाँ अधिकारी र सरकारी मिडियाले खरो आलोचना गरिरहेका छन् ।
यसअघि बेइजिङले चिनियाँ नागरिकलाई जापान यात्रा नगर्न सल्लाहसमेत दिइसकेको छ । सरकारी सल्लाहबिच चिनियाँ पर्यटकको संख्या घट्न थालिसकेको जापानी मिडियाले बताएका छन् ।
उता बेइजिङले ताकाइचीलाई आफ्नो टिप्पणी फिर्ता लिन माग गरेको छ, जसलाई टोकियोले खण्डन गरेको छ । तथापि, दुई देशबिच विवाद कम गर्न कूटनीतिक प्रयास पनि भइरहेको छ । एसिया प्रशान्त क्षेत्रका लागि जापानी विदेश मन्त्रालयका शीर्ष अधिकारी मासाकी कानाई मंगलबार नै बेइजिङ पुगेर आफ्ना चिनियाँ समकक्षी लिउ जिनसोङसँग भेटवार्ता गरेका थिए ।
