काठमाडौँ- मध्यपूर्वको असहज परिस्थितिका कारण इन्धनको मूल्य बढिरहेका बेला क्रोएसियाली सरकारले इन्धनको मूल्यमा लगाइएको सीमालाई थप दुई हप्ताका लागि लम्ब्याउने निर्णय गरेको छ ।
प्रधानमन्त्री आन्द्रेज प्लेन्कोभिकले आयोजित सरकारी बैठकमा यसबारे जानकारी दिनुभएको हो । मंगलवारदेखि लागू हुने नयाँ नियमअनुसार साधारण पेट्रोलको मूल्य प्रतिलिटर १.६२ युरो (१.८८ अमेरिकी डलर) पुग्नेछ भने साधारण डिजेलको मूल्य प्रतिलिटर १.७३ युरो (२ डलर) कायम हुनेछ । यस्तै, मुख्यतया कृषि र माछापालन क्षेत्रमा प्रयोग हुने ‘ब्लु डिजेल’को मूल्य बढेर प्रतिलिटर १.१९ युरो (१.३८ डलर) पुग्ने समाचारमा उल्लेख छ ।
यदि सरकारले यो कदम नचालेको भए साधारण पेट्रोलको मूल्य १.७१ युरो (१.९८ डलर), डिजेलको १.८६ युरो (२.१६ डलर) र ब्लु डिजेलको मूल्य १.२३ युरो (१.४३ डलर) प्रतिलिटर पुग्ने प्रक्षेपण गरिएको थियो । सन् २०२० यता बढ्दो मूल्यवृद्धिको प्रभावबाट सर्वसाधारण र व्यवसायहरूलाई जोगाउन सरकारले ल्याएको यो १० औँ राहत प्याकेज हो। गत फेब्रुअरी महिनामा क्रोएसियाको वार्षिक मुद्रास्फीति दर ३.८ प्रतिशत रहेको थियो । प्रधानमन्त्री प्लेन्कोभिकका अनुसार मध्यपूर्वमा देखिएको तनाव र विश्वव्यापी तेल बजारमा आएको अवरोधका कारण पछिल्ला हप्ताहरूमा ऊर्जाको मूल्य बढेको हो। सरकारको यस कदमले बढ्दो महँगीको भारलाई कम गर्न मद्दत गर्ने विश्वास व्यक्त गरिएको छ ।
मूल्य सीमाको यो नियम राजमार्गमा रहेका पेट्रोल पम्पहरूमा भने लागू हुने छैन, जहाँ मूल्यहरू खुला बजारअनुसार नै रहनेछन् । तोकिएको यो नयाँ मूल्य दर आगामी अप्रिल ६ सम्म प्रभावी रहनेछ ।
