नेपाल प्रहरीका डिएसपी ठगबहादुर केसी भ्रष्टाचारी ठहर

काठमाडौं । १८ लाख रुपैयाँ घुससहित पक्राउ परेका नेपाल प्रहरीका डिएसपी ठगबहादुर केसी भ्रष्टाचारी ठहर भएका छन् ।बिशेष अदालतले मंगलबार उनीविरुद्धको मुद्दामा फैसला सुनाउँदै दोषी ठहर गरेको हो ।

इलाका प्रहरी कार्यालय बुटवलमा कार्यरत रहँदा उनी घुसकाण्डमा पक्राउ परेका थिए । जसमा अख्तियार दुरुपयोग अनुसन्धान आयोगले गत १३ भदौमा मुद्दा दायर गरेको थियो ।

उनी २५ मंसिर २०७९ मा घुससहित पक्राउ परेका थिए। एक व्यवसायीको सुन बरामद गरी फिर्ता दिन उनले आठ लाख ५० हजार नगद र नौ लाख ५० हजारको चेक लिएका थिए ।इप्रका बुटवलबाट सरुवा भइसकेपछि उनले त्यसरी घुस लिएका हुन् । प्रहरी प्रधान कार्यालयकै टोलीले उनलाई पक्राउ गरी अख्तियारमा फाइल बुझाएको थियो ।सो मुद्दामा सुरुमा सरकारी साक्षी बनेका खीलेन्द्रसिंह जिसीले पनि अदालतमा बयान फेरेपछि अख्तियारले उनलाई पनि प्रतिवादी बनाएको थियो । उनी पनि दोषी ठहर भएका छन् ।

नेपाल प्रहरीले यसअघि नै उनलाई बर्खास्त गरिसकेको छ । उनलाई दुई वर्ष कैद र ८ लाख ५० हजार जरिवाना भएको छ।