काठमाडौं – नेपाल चिकित्सक संघले टुथपेस्टलगायत दैनिक प्रयोगमा आउने सामग्रीहरूमा स्वास्थ्यका लागि हानिकारक सिसाको मात्रा अत्यधिक पाइएको भन्दै गम्भीर ध्यानाकर्षण भएको जनाएको छ ।
“जनस्वास्थ्य तथा वातावरण प्रवर्धन केन्द्र (सेफेड) द्वारा हालसालै सार्वजनिक गरिएको अध्ययन प्रतिवेदनअनुसार दैनिक प्रयोगमा आउने टुथपेस्टलगायत मुख तथा दन्त सरसफाइका सामग्रीसहित अन्य विभिन्न सौन्दर्य सामग्रीहरूमा मानव स्वास्थ्यका लागि अत्यन्त हानिकारक रहेको सिसा (Lead) को मात्रा अत्यधिक रहेको भेटिएको प्रति नेपाल चिकित्सक संघको गम्भीर ध्यानाकर्षण भएको छ,” संघका महासचिव डा. सञ्जिब तिवारीले शुक्रबार (२३ माघ) जारी गरेको विज्ञप्तिमा भनिएको छ ।
विभिन्न स्थानबाट गरिएको नमुना संकलनको परीक्षणमा अन्तर्राष्ट्रिय मापदण्डभन्दा बढी सिसा भेटिनु गम्भीर विषय भएको डा. तिवारीले उल्लेख गरेका छन् ।
“देशका विभिन्न शहरमा रहेका पसलहरूबाट नमुना संकलन गरी परीक्षण गरिएकोमा ३१ प्रतिशत संकलित नमुनामा स्वीकृत अन्तर्राष्ट्रिय मापदण्डभन्दा बढी सिसा भेटिनु अत्यन्तै गम्भीर विषय रहेको संघको ठहर छ,” संघले भनेको छ ।
यो विषय चिन्ताजनक रहेको संघले जनाएको छ । “दैनिक रूपमा प्रयोग हुने टुथपेस्टका ४५ प्रतिशत नमुनामा सिसा भेटिनु तथा बालबालिकाका लागि बजारमा उपलब्ध केही सामाग्रीहरू समेत यसमा समावेश हुनुले आम नागरिक तथा बालबालिकाको स्वास्थ्यमा गम्भीर असर पर्न सक्ने विषय अत्यन्त चिन्ताजनक रहेको छ,” विज्ञप्तिमा भनिएको छ ।
विश्व स्वास्थ्य संगठनलगायतका स्वास्थ्यसँग सम्बन्धित निकायहरूले सिसा मानिसको स्वास्थ्यका लागि अत्यन्त हानिकारक रहेको तथ्य प्रमाणित गरेका संघले जनाएको छ । यसले बालबालिकाहरूमा बौद्धिक विकासमा अवरोध, सिकाइमा कठिनाइ, व्यावहारिक समस्या तथा दीर्घकालीन रूपमा दृष्टि, श्रवण र स्नायु प्रणालीमा गम्भीर असरलगायतका नकारात्मक प्रभाव पार्ने वैज्ञानिक रूपमा प्रमाणित तथ्यहरू रहेका संघले उल्लेख गरेको छ ।
“तसर्थ बालबालिकासहित आम नागरिकको स्वास्थ्यमाथि गम्भीर असर पुर्याउने यस्ता सामाग्रीहरूको गुणस्तर मापन गर्नुका साथै कडा नियमन गर्न नेपाल चिकित्सक संघ नेपाल सरकारसँग जोडदार माग गर्दछ,” विज्ञप्तिमा भनिएको छ ।
