‘पहिलो नेपाल-अष्ट्रेलिया कला र साहित्य महोत्सव २०२६ ’सिड्नी अस्ट्रेलियामा सम्पन्न

सिड्नी- म्याक्सवेबर लाइब्रेरी , ब्ल्याकटाउन , सिड्नीसँगको समन्वयमा, अन्तरराष्ट्रिय मातृभाषा दिवसको अवसरमा नेपाली भाषा तथा सांस्कृतिक अभिव्यक्ति – साहित्य महोत्सव २०२६’, सिड्नी अस्ट्रेलियामा सम्पन्न भएको खबर छ Ι
कार्यक्रमको पहिलो सत्रमा ब्ल्याकटाउन सिटी काउन्सिलका काउन्सिलर सुसाई बेन्जामिनले अस्ट्रेलिया जस्तो बहुसाँस्कृतिक देशमा बहुसाँस्कृतिक समुदायको लागि आ-आफ्नो भाषा , साहित्य र संस्कृति उत्थान गर्न सरकारले उचित बजेट छुट्याएको छ भन्दै त्यो बजेट र श्रोत साधनको उपयोग गर्न सुझाव दिएका थिए Ι
कार्यक्रमकाे पहिलाे स्रष्टा सम्मान सत्रमा अस्ट्रेलियामा बसोबास गर्ने नेपालभाषी सत्र जना लेखकहरूले आफ्नो परिचय र पुस्तक सहित सामुहिक फोटोमा सहभागी भएका थिए Ι सो शो केसमा डा. ओम ढुंगेल , सौरभ किरण श्रेष्ठ , जानकी पौडेल, निस्प्रभ सजी, सानु घिमिरे, श्वेता मैनाली, सिमा रोशी , प्रज्ञा पनेरु , प्रकाश पन्थी , अस्मित रेग्मी , केदार पोख्रेल, भरत राई, ममता तिवारी , प्रविन टन्डन , कुमार शर्मा , भावना पराजुली, महेश्वर शर्मा लगायत लेखकहरू सहभागी भएका थिए Ι
कार्यक्रमको दोश्रो सत्रमा करीब दुइ दर्जन सर्जकहरूले नेपाली भाषामा आफ्नो कविता वाचन गरेका थिए Ι सोही समारोहमा , बहुसांस्कृतिक समुदायका लेखक अब्बास राज अलीले आफ्नो कविता उर्दू भाषामा वाचन गरेका थिए Ι
कार्यक्रमको तेश्रो सत्रमा दोश्रो पुस्ताका बालबालिकाहरूले नेपाली साँस्कृतिक प्रस्तुति प्रस्तुत गरेका थिए Ι ब्ल्याकटाउन नेपाली कम्युनिटी अन्तर्गत सञ्चालित सम्झना पाठशाला र भुट्निज एसोसिएसन इन अस्ट्रेलियाले सो साँस्कृतिक कार्यक्रमलाई संयोजन गरेका थिए Ι त्यसरी नै अतिथिका रूपमा उपस्थित गायिका मथुरा श्रेष्ठले कार्यक्रममा “जहाँ छन् बुद्धका आँखा” गीत प्रस्तुत गरेकी थिइन् ।
कार्यक्रमको चौथो सत्रमा , अस्ट्रेलिया बसेर नेपाली साहित्यको पुस्तक प्रकाशन गरेका साहित्यकारहरू मध्ये प्रकाश पन्थीको उपन्यास “महबी मिका” माथि बहस गरिएको थियो Ι लेखक सानु घिमिरेले मोडरेट गरेको सो प्यानल डिस्कसनमा “महबी मिका” का लेखक प्रकाश पन्थी , सिड्नीकै अर्का लेखक देब पाठक र लेखक प्रज्ञा पनेरुले बहसमा उठाइएका विभिन्न प्रश्नमाथि आ-आफ्ना विचार प्रकट गरेका थिए Ι
म्याक्सवेबर पुस्तकालय र नेपाली समुदायबीच पुलको भुमिका निर्वाह गर्नु भएका साहित्यकार सौरभकिरण श्रेष्ठले स्तरीय कार्यक्रम सम्पन्न गर्न पाउँदा खुशी व्यक्त गर्दै यो कार्यक्रमले हाम्रो समुदायको साहित्यिक र सांस्कृतिक क्षमतालाई यहाँको काउन्सिल र अन्य समुदाय समक्ष पुर्याउन सहयोग गरेको बताउनु भयो Ι
ब्ल्याकटाउन नेप्लिज कम्युनिटीकी अध्यक्ष प्रकृति श्रेष्ठले कार्यक्रमको औचित्यमाथि बोल्दै स्वागत गरेकी थिईन् भने , अनेसास एन एस डब्ल्यु अस्ट्रेलियाका संयोजक डा प्रकाश पौडेलले धन्यवाद ज्ञापन गरेका थिए Ι एसोसिएसन अफ भुटनिज इन अस्ट्रेलियाको तर्फबाट दिव्या श्री आचार्यले कार्यक्रम सञ्चालन गरेकी थिईन् Ι
कार्यक्रमलाई सौरभ किरण श्रेष्ठले निर्देशन र सानु घिमिरेले संयोजन गरेका थिए Ι त्यसै गरी सहआयोजकको रुपमा ब्ल्याकटाउन नेप्लिज कम्युनिटी , अन्तर्राष्ट्रिय नेपाली साहित्य समाज र एसोसिएसन अफ भुटनिज इन अस्ट्रेलिया संलग्न थिए।