काठमाडौं — काठमाडौं महानगरपालिकाका प्रमुख बालेन्द्र साहले महानगरले १ हजार ८ सय ५९ रोपनी सार्वजानिक जग्गा अतिक्रमणमुक्त गराउने लक्ष्य राखेको बताउनुभएको छ ।
काठमाडौं महानगरपालिकाले सोमबार टुँडिखेलमा आयोजना गरेको महानगर दिवसको अवसरमा आयोजित समारोहमा उहाँले दुई खर्ब मूल्य बराबरको उक्त जग्गा फिर्ता गराउने लक्ष्य राखेको बताउनुभएको हो । उहाँले आफूहरू निर्वाचित भएर आएपछि २३ अर्ब रूपैयाँ मूल्य बराबरको २ सय ८ रोपनी बढी सार्वजानिक जग्गा फिर्ता भएको जानकारी दिनुभयो ।
सार्वजानिक जग्गा फिर्ता ल्याउने कार्यमा सबैको सहयोग रहने उहाँले अपेक्षा व्यक्त गर्नुभयो । उहाँले महानगरले दुई अर्ब ८६ करोड रूपैयाँ बराबरको पुर्वाधार योजना सम्पन्न गरेको पनि जानाकारी दिनुभयो । धुलोरहीत कार्यक्रम अन्तर्गत ५५ वटा सडक सुधार र ६२ वटा चोकमा हाई मासलाइट जडान गरिएको उहाँले बताउनु भयो ।
सडकबत्तीको गुणस्तर वृद्धि गर्न र रात्रिकालिन सहरी सौन्दर्य बढाउन ५ हजार तीन सय १८ वटा पोलमा १३ हजार ३ सय ४० वटा बत्ती राखेर सहरलाई उज्यालो बनाउन लागिएको पनि उहाँले जानकारी दिनुभयो । उहाँले महानगरले करिब ९१ करोड लागत बराबरको सम्पदा संरक्षणकाे काम गरिएको पनि बताउनुभयो ।
महानगरले १ हजार ८६ जना विपन्न नागरिकलाई उपचार गर्न सिफारिस गरेको र २१० जनालाई निःशुल्क उपाचार गरिएको पनि उहाँले जानकारी दिनुभयो । उहाँले महानगरले चालु खर्च कम र पुँजीगत खर्च बढी गर्नेगरी काम गरिरहेको पनि जानकारी दिनुभयो । महानगरले वातावरण सुधार, धुलोरहीत सडक, फोहोर व्यवस्थापन, व्यवस्थित र उज्यालो सहर निर्माणलाई विशेष प्राथमिकतामा राखेर कार्य गरिरहेको उहाँको भनाइ छ ।
