काठमाडौं – भारतको कोलकाताबाट चेन्नईका लागि उडेको इन्डिगो एयरलाइन्सको विमानमा इन्जिनमा खराबी देखिएपछि मंगलबार अबेर राति चेन्नई विमानस्थलमा पूर्ण आपतकाल घोषणा गरिएको छ।
भारतीय विमानस्थल प्राधिकरणका अनुसार इन्डिगोको उडान नम्बर ६ई–७२३ मा २२४ जना यात्रु तथा चालक दलका सदस्य सवार थिए। विमानले अगस्ट ११ राति करिब ११:२९ बजे इन्जिनमा समस्या आएको जानकारी गराएको थियो।
अवतरणको तयारी गरिरहेका बेला विमानको बायाँ इन्जिनले काम गर्न छाडेको पाइलटले थाहा पाएपछि तत्काल हवाई यातायात नियन्त्रण (एटीसी) लाई जानकारी गराएका थिए। त्यसपछि चेन्नई विमानस्थलमा विमानको सुरक्षित अवतरणका लागि आपतकालीन उद्धार तथा सुरक्षा संयन्त्र सक्रिय पारिएको थियो।
विमान राति ११:३७ बजे चेन्नई विमानस्थलमा २२४ यात्रु तथा चालक दलका सदस्यसहित सुरक्षित रूपमा अवतरण गरेको अधिकारीहरूले जनाएका छन्। सुरक्षित अवतरणपछि राति ११:४७ बजे आपतकालीन अवस्था हटाइएको थियो।
घटनाका कारण विमानस्थलको नियमित सञ्चालनमा भने कुनै ठूलो असर नपरेको र सबै उडान तथा सेवा सामान्य रूपमा सञ्चालन भइरहेको विमानस्थल अधिकारीहरूले बताएका छन्।
