काठमाडौं- रोयल च्यालेन्जर्स बेंगलुरु (आरसीबी)ले चेन्नई सुपर किंग्स (सिएसके)लाई ४३ रनले पराजित गरेको छ। आइतबार आईपीएल २०२६ को उच्च प्रतिस्पर्धात्मक खेल बेंगलुरुको एम चिन्नास्वामी रंगशालामा भएको थियो।
यस खेलमा बेंगलुरुले देवदत्त पडिक्कल र टिम डेभिडको अर्धशतकीय पारिको मद्दतले २० ओभरमा ३ विकेट गुमाउँदै २५० रन बनायो। जवाफमा चेन्नई १९.४ ओभरमा २०७ रनमै अलआउट भयो।
चिन्नास्वामीमा चेन्नईविरुद्ध बेंगलुरुले लगातार तेस्रो पटक २०० भन्दा बढी स्कोरको सफल रक्षा गरेको छ। यसअघि बेंगलुरुले २०२४ र २०२५ मा क्रमशः २७ र २ रनले खेल जितेको थियो। योसँगै आरसीबीले ४३ रनले शानदार जित निकाल्दै आफ्नो रेकर्ड अझ सुधार गरेको हो। यो बेंगलुरुको लगातार दोस्रो जित हो। उता चेन्नईको यस सिजनमा लगातार तेस्रो हार हो।
बेंगलुरुले दिएको २५१ रनको लक्ष्य पछ्याउन उत्रिएको चेन्नईको सुरुवात राम्रो रहेन। कप्तान ऋतुराज गायकवाड मात्र ७ रन बनाएर आउट भए। सञ्जु सामसन ५ बलमा ९ रन बनाएर पभेलियन फर्किए।
आयुष म्हात्रे पनि राम्रो प्रदर्शन गर्न सकेनन् र १ रनमै आउट भए। कार्तिक शर्माले लगातार तेस्रो खेलमा निराशाजनक प्रदर्शन गरे र ३ बलमा ६ रन मात्रै बनाए। शिवम दुबेले राम्रो सुरुवातलाई ठूलो स्कोरमा बदल्न सकेनन् र १३ बलमा १८ रन बनाएर अभिनन्दन सिंहको शिकार बने।
सरफराज खानले एक छेउ सम्हाल्दै २५ बलमा ५० रनको उत्कृष्ट पारी खेले। उनले ८ चौका र २ छक्का प्रहार गरे। प्रशान्त वीरले २९ बलमा ४३ रन बनाए र उनले जेमी ओभरटनसँग मिलेर सातौँ विकेटका लागि ५७ रनको साझेदारी गरे। ओभरटनले ३७ रन जोडे।
नूर अहमद ८ रन बनाएर भुवनेश्वर कुमारबाट आउट भए। म्याट हेनरीलाई अभिनन्दन सिंहले २ रनमा आउट गरे। बलिङतर्फ बेंगलुरुका भुवनेश्वर कुमारले सबैभन्दा धेरै ३ विकेट लिए। ज्याकब डफी र क्रुणाल पाण्ड्याले २–२ विकेट लिए।
यसअघि टस हारेर पहिले ब्याटिङ गरेको बेंगलुरुलाई फिल साल्ट र विराट कोहलीले राम्रो सुरुवात दिलाए। दुवैबीच पहिलो विकेटका लागि ३७ रनको साझेदारी भयो। कोहली १८ बलमा २८ रन बनाएर आउट भए। साल्टले ३० बलमा ४६ रन बनाए।
त्यसपछि देवदत्त पडिक्कलले जिम्मेवारी सम्हाले। उनले लगातार दोस्रो खेलमा अर्धशतक बनाए। पडिक्कलले २९ बलमा ५० रन बनाए। उनले कप्तान रजत पाटीदारसँग मिलेर तेस्रो विकेटका लागि २१ बलमा ५८ रनको साझेदारी गरे।
त्यसपछि टिम डेभिड र रजत पाटीदारले खेल सम्हाले। दुवैले ३५ बलमा ९९ रनको अविजित साझेदारी गरे। पाटीदारले १ चौका तथा ६ छक्का प्रहार गर्दै १९ बलमा ४८ रन बनाए। डेभिडले २५ बलमा ३ चौका तथा ८ छक्का प्रहार गर्दै ७० रन बनाए। यी दुवैको उत्कृष्ट पारिका कारण बेंगलुरुले यस सिजनकै सबैभन्दा ठूलो स्कोर बनायो। बलिङतर्फ चेन्नईका अंशुल कम्बोज, जेमी ओभरटन र शिवम दुबेले १–१ विकेट लिए।
बेंगलुरुको कीर्तिमान
यस खेलमा बेंगलुरुले धेरै रेकर्ड बनायो। यो बेंगलुरुको आईपीएलमा तेस्रो ठूलो स्कोर हो। यसअघि टोलीले २०१३ मा पुणे वारियर्सविरुद्ध ५ विकेटमा २६३ रन बनाएको थियो। त्यसपछि हैदराबादविरुद्ध ७ विकेटमा २६२ रन बनाएको थियो। चेन्नईविरुद्ध भने यो बेंगलुरुको पाँचौँ २०० भन्दा बढी स्कोर हो।
यस खेलमा बेंगलुरुका ब्याट्सम्यानहरूले छक्काको वर्षा गरे। फिल साल्टले २, विराट कोहलीले १, देवदत्त पडिक्कलले २, रजत पाटीदारले ६ र टिम डेभिडले ८ छक्का प्रहार गरे। जम्मा १९ छक्का प्रहार भए, जुन चेन्नईविरुद्ध कुनै पनि टोलीले बनाएको सबैभन्दा धेरै हो।
यसअघि कोलकाता नाइट राइडर्स र राजस्थान रोयल्सले २०१८ र २०२० मा १७–१७ छक्का प्रहार गरेका थिए। अब सबैभन्दा धेरै छक्काको रेकर्ड बेंगलुरुको नाममा दर्ता भएको छ।
बेंगलुरुले यस खेलमा अन्तिम पाँच ओभरमा ९७ रन बनायो, जुन आईपीएल इतिहासको दोस्रो ठूलो स्कोर हो। १५ ओभरसम्म बेंगलुरुले ३ विकेट गुमाएर १५३ रन बनाएको थियो। त्यसपछि पाटीदार (अविजित ४८) र डेभिड (अविजित ७०) ले अन्तिम पाँच ओभरमा कुनै विकेट नगुमाई ९७ रन जोडे।
१६ देखि २० ओभरसम्म ९७ रन कुनै पनि टोलीले बनाएको संयुक्त रूपमा दोस्रो ठूलो स्कोर हो। यसअघि २०२४ मा दिल्ली क्यापिटल्सले गुजरात टाइटन्सविरुद्ध यति नै रन बनाएको थियो।
यस मामिलामा शीर्ष स्थानमा भने बेंगलुरु नै छ, जसले २०१६ मा यही मैदानमा गुजरात लायन्सविरुद्ध १६–२० ओभरमा २ विकेट गुमाएर ११२ रन बनाएको थियो
