इजरायलले पनि संयुक्त राष्ट्रसंघ (युएन)सम्बद्ध कयौँ एजेन्सीबाट आफूलाई अलग्यायो

तेल अभिभ – अमेरिकी कदमलाई पछ्याउँदै इजरायलले संयुक्त राष्ट्रसंघ (युएन)सम्बद्ध कयौँ एजेन्सीबाट आफूलाई अलग्याएको छ । यी एजेन्सीहरूले आफूमाथि पक्षपात गरेको र राजनीति गरेको इजरायलको दाबी छ ।
गतहप्ता मात्रै अमेरिकी राष्ट्रपति डोनाल्ड ट्रम्पले अमेरिकी हितका विरुद्धमा काम गरिरहेको भन्दै युएन र अन्य अन्तर्राष्ट्रिय संस्था समेत गरेर ६६ वटा सङ्गठन र सन्धिबाट अमेरिकालाई अलग्याएका थिए । यसमध्ये आधा जति युएनका सङ्गठन थिए ।
इजरायलमाथि पक्षपात गरेकोदेखि अप्रभावकारी कर्मचारीतन्त्रसम्मका कारण औँल्याउँदै बालबालिका र सशस्त्र द्वन्द्व, लैङ्गिक समानता र महिला सशक्तीकरण, ऊर्जा, आप्रवासनसँग सम्बन्धित युएनका एजेन्सीबाट बाहिरिने निर्णय गरिएको इजरायलका विदेशमन्त्री गिदेओन सरले मंगलबार घोषणा गरेका थिए ।
बहिर्गमन तत्कालै लागू हुने बताइएको छ । बालबालिका तथा सशस्त्र द्वन्द्वका लागि महासचिवको विशेष प्रतिनिधिको कार्यालयले २०२४ को जुनमा एउटा प्रतिवेदनमा इजरायललाई आईएसआईएस र बोको हरामसँगै कालो सूचीमा राखेको थियो ।
सन् २०२३ को अक्टोबरमा इजरायली महिलामाथि भएका सबै यौन दूर्व्यवहारका मामिलालाई युएन वुमनले जानी जानी बेवास्ता गरेको भन्दै इजरायललाई यस एजेन्सीबाट बाहिर निकालेको बताइएको छ । सरकारले युएनका अन्य एजेन्सीसँगको सम्बन्ध पनि निरन्तर छानबिन गर्ने मन्त्रालयले जनाएको छ ।