सरकारले सार्वजनिक गर्‍यो नयाँ तलबमान, साउनदेखि १० प्रतिशत प्रोत्साहन भत्ता लागू हुने

काठमाडौं — अर्थ मन्त्रालयले चालु आर्थिक वर्ष २०८३/८४ का लागि नयाँ तलबमान सार्वजनिक गरेको छ। मन्त्रिपरिषद्को निर्णयअनुसार साउनदेखि लागू हुने गरी निजामती कर्मचारी, सुरक्षा निकाय, स्वास्थ्य सेवा, शिक्षक तथा प्रदेश र स्थानीय तहका कर्मचारीको नयाँ तलबमान निर्धारण गरिएको हो।

गत साउन ६ गते बसेको मन्त्रिपरिषद् बैठकले नयाँ तलबमान, ग्रेड, प्राविधिक ग्रेड तथा प्रोत्साहन भत्तासम्बन्धी निर्णय गरेको थियो। सरकारले गत जेठ १५ गते सार्वजनिक गरेको बजेटमार्फत कर्मचारीको तलब १० प्रतिशत वृद्धि गर्ने र १० प्रतिशत प्रोत्साहन भत्ता उपलब्ध गराउने घोषणा गरेको थियो।

अर्थ मन्त्रालयले बुधबार सरकारी निकायलाई पठाएको पत्रमार्फत नयाँ तलबमानबारे जानकारी गराएको हो। नयाँ व्यवस्था अनुसार निजामती कर्मचारी, नेपाली सेना, नेपाल प्रहरी, सशस्त्र प्रहरी बल, स्वास्थ्य सेवा, संसद् सेवा, सामुदायिक विद्यालयका शिक्षक तथा प्रदेश र स्थानीय तहका कर्मचारीले नयाँ तलबमान, एक दिनको तलब बराबरको ग्रेड रकम तथा वृद्धि भएको तलबमानको १० प्रतिशत मासिक प्रोत्साहन भत्ता पाउनेछन्।

मन्त्रालयले निवृत्तभरण प्रयोजनका लागि समेत विभिन्न श्रेणीको नयाँ तलबमान निर्धारण गरेको छ।

नयाँ तलबमानअनुसार:

• मुख्य सचिव — ८४ हजार ९३२ रुपैयाँ
• राजपत्रांकित विशिष्ट श्रेणी — ७९ हजार २९० रुपैयाँ
• अतिरिक्त सचिव (पेन्सन प्रयोजन) — ६६ हजार ५३९ रुपैयाँ
• राजपत्रांकित प्रथम श्रेणी — ६२ हजार ४६६ रुपैयाँ
• राजपत्रांकित द्वितीय श्रेणी — ५३ हजार ६११ रुपैयाँ
• राजपत्रांकित तृतीय श्रेणी — ४८ हजार ५८ रुपैयाँ

त्यस्तै, राजपत्र अनंकित कर्मचारीतर्फ:

• राजपत्र अनंकित प्रथम (अतिरिक्त मान पेन्सन) — ४१ हजार ५१७ रुपैयाँ
• राजपत्र अनंकित प्रथम — ३८ हजार २०३ रुपैयाँ
• राजपत्र अनंकित द्वितीय (अतिरिक्त मान पेन्सन) — ३७ हजार ४०७ रुपैयाँ
• राजपत्र अनंकित द्वितीय — ३६ हजार १९२ रुपैयाँ
• राजपत्र अनंकित तृतीय — ३० हजार ३७३ रुपैयाँ
• राजपत्र अनंकित चतुर्थ — २८ हजार ६९० रुपैयाँ

अर्थ मन्त्रालयले नयाँ तलबमान कार्यान्वयन गर्न सम्बन्धित सबै सरकारी निकायलाई आवश्यक व्यवस्था मिलाउन निर्देशन दिएको छ।