काठमाडौँ- नेकपा एमालेभित्र नेतृत्व विवाद चुलिँदै गएको छ। महासचिव शंकर पोखरेलले अध्यक्ष केपी शर्मा ओलीलाई नेतृत्व छाड्न सुझाव दिएको चर्चा बाहिरिएको छ। पार्टी पुनर्गठन, पुस्तान्तरण र नयाँ नेतृत्वबारे बहस तीव्र बनेसँगै एमालेभित्र राजनीतिक हलचल बढेको छ।
काठमाडौं । नेकपा एमालेभित्र नेतृत्व र पार्टी पुनर्गठनलाई लिएर आन्तरिक बहस र असन्तुष्टि बढ्दै गएको छ। पार्टी महासचिव शंकर पोखरेलले अध्यक्ष केपी शर्मा ओलीलाई नेतृत्व हस्तान्तरणबारे सोच्न सुझाव दिएको चर्चा बाहिरिएपछि एमालेभित्रको शक्ति समीकरण फेरि चर्चामा आएको छ।
स्रोतहरूका अनुसार पोखरेलले हालको राजनीतिक परिस्थिति, निर्वाचन परिणाम र पार्टीको संगठनात्मक अवस्थालाई मूल्याङ्कन गर्दै अध्यक्ष ओलीलाई सम्मानजनक बहिर्गमनमार्फत पार्टी पुनर्गठनको बाटो खोल्नुपर्ने धारणा राखेका थिए। उनले पार्टीलाई पुनः निर्णायक राष्ट्रिय शक्तिका रूपमा स्थापित गर्न नयाँ पुस्तालाई अवसर दिनुपर्ने आवश्यकता औँल्याएको बताइएको छ।
पोखरेलले आन्तरिक छलफलका क्रममा ओली नेतृत्वमा पार्टी एकताबद्ध हुन कठिन हुने र आगामी राजनीतिक प्रतिस्पर्धामा साख फर्काउन चुनौतीपूर्ण हुने निष्कर्षसमेत प्रस्तुत गरेको स्रोतहरूको दाबी छ। तर अध्यक्ष ओलीले भने तत्काल कुनै स्पष्ट प्रतिक्रिया नदिएको र बैठकमै असन्तुष्ट देखिएको चर्चा छ।
यसबीच एमालेभित्र नेतृत्व परिवर्तन, पुस्तान्तरण र पुनर्गठनबारे बहस झन् तीव्र बनेको छ। केही नेताहरू ओलीको निरन्तर नेतृत्व पक्षमा छन् भने अर्काे समूहले पार्टीलाई नयाँ दिशातर्फ लैजान नेतृत्व हस्तान्तरण आवश्यक रहेको बताउँदै आएको छ।
पछिल्लो समय पार्टीभित्र देखिएको मतभेदले एमालेको आन्तरिक एकता र आगामी रणनीतिमा प्रभाव पार्न सक्ने विश्लेषण पनि राजनीतिक वृत्तमा गरिएको छ।
