मुक्तकसङ्ग्रह ‘भेडापन्थी’ र ‘सम्बोधन’ विमोचन

जेठ १५, पोखरा, सुन्दर शहर पोखराको न्युरोडमा स्थित हिमालय रिडर्स कर्नरको सभाहलमा एक बृहत् कार्यक्रमको आयोजना गरी दुई कृतिहरूको लोकार्पण गरिएको छ ।
नेपाल मुक्तक प्रतिष्ठान दक्षिण कोरिया शाखाको आफ्नो प्रत्येक कार्यकालमा घरदेशमा पनि एउटा कार्यक्रम गर्ने नीति रहेको छ । त्यसै अनुरूप सो कार्यक्रम सम्पन्न गरिएको हो ।उक्त कार्यक्रममा नेपाल मुक्तक प्रतिष्ठान दक्षिण कोरिया शाखाका अध्यक्ष आर एन अधिकारीको मुक्तकसङ्ग्रह ‘भेडापन्थी’ र संस्थाकै पूर्व सहसचिव डीआर न्यौपाने ‘सूर्य’को ‘सम्बोधन’ मुक्तकसङ्ग्रहको लोकार्पण तथा बृहत् मुक्तक वाचन कार्यक्रम सम्पन्न गरिएको छ ।
प्रमुख अतिथि प्राज्ञ ÷साहित्यकार सरुभक्त श्रेष्ठ र विशेष अतिथिका रूपमा नेपाल मुक्तक प्रतिष्ठान काठमाडौंँका अध्यक्ष रामकाजी कोने, वरिष्ठ लोकगायिका÷ साहित्यकार हरिदेवी कोइराला र साहित्यकार महेन्द्रमान शाक्यको उपस्थितिमा संस्थाका कार्यसमिति सदस्य एवम् कार्यक्रम संयोजक ह्यारी वोण्डको सभापतित्वमा सप्पन्न भएको थियो ।

देशका विभिन्न ठाउँहरूबाट विशेष वाचकको रूपमा आएका मुक्तककारहरू रामचन्द्र शर्मा, भोजराज घोडासैनी, सरला लामिछाने सरु, अनिता दाहाल र कल्याण सापकोटाले आफ्ना मुक्तक सुनाएर कार्यक्रमलाई मुक्तकमय बनाएका थिए । कार्यक्रममा करिब ५० जना स्रष्टाहरूले आफ्ना रचना वाचन गरेका थिए भने करिब १०० जना स्रष्टाहरूको प्रत्यक्ष उपस्थित थियो ।
कार्यक्रमका प्रमुख अतिथि सरूभक्त श्रेष्ठले नेपाल मुक्तक प्रतिष्ठान कोरिया नेपाली मुक्तकको विकासमा दरिलो खम्बा भएको उल्लेख गर्दै मुक्तकको विकासमा युवाहरूले देखाएको योगदानको खुलेर प्रशंसा गरे । मुक्तक आफैँमा सानो आकारको विधा भएर पनि अन्य विधा जत्तिकै ल्याकत राख्ने विधा भएको कुरा विशेष अतिथि रामकाजी कोनेले बताएका थिए । साथै विमोचित कृति र कृतिकारलाई बधाई दिएका थिए । हरिदेवी कोइरालाले परदेशमा रहेर पनि नेपाली मुक्तकको विकास र विस्तारमा निकै ठुलो योगदान गरिरहेको मुक्तक प्रतिष्ठान कोरियाको प्रसंशा गर्दै यी दुई कृतिले नेपाली मुक्तकको क्षेत्रमा ठुलो हलचल पैदा गर्ने विश्वास व्यक्त गरेकी थिइन् ।
संस्थाका कोषाध्यक्ष आर पी सी संगमद्वारा कार्यक्रम सञ्चालन गरिएको थियो भने दिपक राज बन्जाडेले स्वागत मन्तव्य दिएका थिए ।।