काठमाडौँ- नेपाली कांग्रेसले आगामी प्रतिनिधि सभा र राष्ट्रियसभा निर्वाचनका लागि उम्मेदवार चयनमा स्पष्ट निर्देशन जारी गर्दै हाल बहालमा रहेका व्यक्तिलाई उम्मेदवार नबनाउने निर्णय गरेको छ ।
कांग्रेस मुख्य सचिव कृष्णप्रसाद पौडेलले उम्मेदवार सिफारिससम्बन्धी यसअघिको परिपत्रलाई अझ स्पष्ट पार्दै नयाँ परिपत्र जारी गरेका हुन् ।परिपत्रअनुसार, राष्ट्रियसभा र प्रदेशसभामा हाल बहालमा रहेका सांसद वा सदस्यहरूको नाम आगामी निर्वाचनका लागि उम्मेदवारको रूपमा सिफारिस गर्न पाइने छैन ।
साथै, स्थानीय तहमा हाल बहाल रहेका निर्वाचित जनप्रतिनिधिहरूलाई प्रतिनिधिसभा प्रत्यक्षतर्फ, समानुपातिकतर्फ तथा राष्ट्रियसभा निर्वाचनका लागि उम्मेदवार बन्न नदिने निर्णय परिपत्रमा उल्लेख गरिएको छ । यसैगरी, प्रदेशसभा निर्वाचन–२०७९ मा समानुपातिकतर्फको बन्दसूचीमा समावेश उम्मेदवारहरूको नाम पनि आगामी निर्वाचनमा सिफारिस गर्न नपाइने भनिएको छ ।
परिपत्रमा तोकिएको भन्दा बढी संख्यामा उम्मेदवार सिफारिस नगर्न समेत निर्देशन दिइएको छ । उल्लिखित संख्या भन्दा बढी नाम सिफारिस भएमा केन्द्रले त्यसको कार्यान्वयन नगर्ने जानकारी दिइएको छ ।
प्रतिनिधिसभाको प्रत्यक्षतर्फको निर्वाचनका लागि प्रत्येक क्षेत्रमा कम्तिमा एक महिला समावेश गरी अधिकतम तीन जना नाम सिफारिस गर्नुपर्ने परिपत्रमा उल्लेख छ । समानुपातिकतर्फको सिफारिसमा समावेशी सिद्धान्तअनुसार कम्तिमा एक महिला राख्नुपर्ने व्यवस्था गरिएको छ ।
राष्ट्रियसभा निर्वाचनका लागि प्रत्येक सिटमा तीन जनाको नाम सिफारिस गर्नुपर्ने व्यवस्था गरिएको छ । नाम सिफारिस गर्ने बैठकमा सहमति भएमा सहमतिबाट निर्णय गर्नुपर्ने, सहमति नभए बहुमतबाट निर्णय लिनुपर्ने व्यवस्था परिपत्रमा स्पष्ट पारिएको छ ।
