कविता: तिम्रो मात्र होइन हाम्रो पनि हो गणतन्त्र
नछाँट अतिरञ्जनाका भाषणहरू
नदेखाऊ अतिशयोक्तिको शक्ति र आसन
कोरा सपना बाँडेर
नसताऊ
दीनहिन जनका मन र मस्तिष्क
ननाघून् कसैले विधानको परिधि
नतेर्स्याउन उन्नतिमा बाधाको तगारो
नवनुन् कोही गणतन्त्रमा भ्रष्ट र तस्कर
सच्चा गणतन्त्र त न्याय हो
समानताको अध्याय हो ।
पानीमुनिको ओभानो
शासन होइन
दौलत सञ्चयको होड पनि होइन
नेताको पेवा पनि होइन
शासक मालिक र जनता दास हुने
खुट्किलो होइन गणतन्त्र
गणतन्त्र रङ्गीन लुगा फेरे जस्तो
फेसनेवल बुटिकशाला होइन
विधि हो
पद्धति हो
संस्कार र संस्कृति हो
असुरक्षा होइन सुरक्षा हो
गणतन्त्र तिम्रो मात्र होइन – हाम्रो पनि हो
गणतन्त्र जनताको बलिदानीबाट प्राप्त विरासत हो
सिमित अभीष्ट देख्नेको बपौती होइन ।
गणतन्त्र दिवसको शुभकामना !
ऋषभदेव घिमिरे
काठमाडौ
Comments are closed.