भारत विरोधी राष्ट्रपति मुइज्जुको मालदिभ्सको संसदमा भारी बहुमत
काठमाडौं । मालदिभ्समा ‘भारत छोड’ अभियान चलाएर चर्चामा आएका राष्ट्रपति मोहम्मद मुइज्जुको पार्टी पिपुल्स नेशनल कांग्रेस (पीएनसी)ले संसदमा भारी बहुमत हासिल गरेको छ ।आइतबार ९३ सिटका लागि मतदान भएको थियो । तीमध्ये मुइज्जुको पार्टीले ६६ सिटमा जित हासिल गरेको मालदिभ्सको चुनाव आयोगले जनाएको छ । यसैगरी पूर्वराष्ट्रपति मोहम्मद सोलिहको पार्टी माल्दिभियन डेमोक्र्याटिक पार्टी (एमडीपी)ले १२ र स्वतन्त्र उम्मेदवारहरुले १० सिट जितेका छन् ।
गत वर्ष सेप्टेम्बरमा भारत निकट मानिने मोहमम्द सोलिहलाई हराएर चीन निकट मानिने मुइज्जु राष्ट्रपति बनेका थिए । तर संसदमा भने सोलिहकै मालदिभियन डेमोक्रेटिक पार्टीको बहुमत थियो ।
चुनाव आयोगका अनुसार आइतबार स्थानीय समय अनुसार साँझ पाँच बजेसम्म करिब दुई लाख जनाले मतदानमा भाग लिएका थिए । ७२.९६ प्रतिशत मत खसेको आयोगले जनाएको छ ।९३ सिटका लागि भएको निर्वाचनमा ३६८ जना उम्मेदवार थिए । तीमध्ये १३० उम्मेदवार स्वतन्त्र थिए ।
मालदिभ्सको मिडिया हाउस द एडिसनका अनुसार यो चुनाव राष्ट्रपति मुइज्जुको ६ महिने कार्यकालको परीक्षा थियो । उनी सन् २०२३ को सेप्टेम्बरमा ‘इण्डिया आउट’ अभियान चलाएर देशको राष्ट्रपति चुनिएका थिए ।
उनले भारतीय सेनालाई ६ महिनाभित्र मालदिभ्स छाड्न भनेका थिए । भारतविरोधी उनको कदमले दुई देशबीचको सम्बन्ध बिग्रिएको छ । भारतले पनि मालदिभ्सका कूटनीतिज्ञहरुलाई भारत छाड्न निर्देशन दिएको थियो । साथै मालदिभ्स भ्रमणका लागि भनेर भारतीयहरुले गरेको होटल बुकसमेत रद्द गराइएको थियो ।
Comments are closed.