काठमाडौं-प्रधानमन्त्री बालेन शाहले सोमबार भारत र चीनका राजदूतसँग छुट्टाछुट्टै भेटवार्ता गर्ने भएका छन्। छिमेकी मुलुकसँगको सम्बन्ध, आर्थिक कूटनीति र द्विपक्षीय सहकार्यलाई केन्द्रमा राखेर प्रधानमन्त्री शाहले दुवै राजदूतसँग छलफल गर्ने तयारी गरेका हुन्।
परराष्ट्र मन्त्रालयका अनुसार प्रधानमन्त्री शाहले सोमबार बिहान ११ बजे सिंहदरबारस्थित प्रधानमन्त्री तथा मन्त्रिपरिषद्को कार्यालयमा भारतीय राजदूत नवीन श्रीवास्तवसँग भेटवार्ता गर्नेछन्।
भारतीय राजदूतसँगको भेटवार्तालगत्तै प्रधानमन्त्री शाहले चिनियाँ राजदूतसँग पनि भेट गर्ने कार्यक्रम छ। चिनियाँ राजदूतसँगको भेटमा शिष्टाचारका साथै नेपाल–चीन द्विपक्षीय सम्बन्ध र आपसी हितका विषयमा छलफल हुने बताइएको छ।
दुवै भेटवार्तामा नेपालका छिमेकी मुलुकसँगको बहुआयामिक सम्बन्ध, विकास साझेदारी, सीमा व्यवस्थापन, व्यापार तथा आर्थिक सहकार्यलगायत विषयमा छलफल हुने अपेक्षा गरिएको छ।
प्रधानमन्त्री शाहले आफ्नो १०० बुँदे सुधार योजनासँगै छिमेकी मुलुकहरूसँग सन्तुलित सम्बन्ध र आर्थिक कूटनीतिलाई प्राथमिकतामा राख्दै आएका छन्। भारत र चीन दुवै देशका राजदूतसँग एकै दिन हुन लागेको भेटलाई प्रधानमन्त्रीको छिमेक नीति र आर्थिक कूटनीतिका दृष्टिले अर्थपूर्ण रूपमा हेरिएको छ।
प्रधानमन्त्रीको जिम्मेवारी सम्हालेपछि शाहले नेपालका विकास आवश्यकता र राष्ट्रिय हितलाई केन्द्रमा राख्दै छिमेकी मुलुकसँग सहकार्य विस्तार गर्ने नीति अघि सारेका छन्। सोमबारका भेटवार्तालाई सोही नीतिको निरन्तरताका रूपमा समेत हेरिएको छ।
