काठमाडौं –भारतको झारखण्डमा भर्ती परीक्षामा अनियमितता भएको आरोप लगाउँदै सुरु गरिएको आन्दोलन चर्किएको छ। झारखण्ड लोकतान्त्रिक क्रान्तिकारी मोर्चा (जेएलकेएम) का नेता देवेन्द्रनाथ महतोले थालेको आमरण अनशन बुधबार ११औँ दिनमा प्रवेश गरेको छ। स्वास्थ्य अवस्था कमजोर बनेपछि उनलाई अस्पताल भर्ना गरिए पनि उनले अनशन जारी राखेका छन्।
झारखण्ड लोक सेवा आयोग (जेपीएससी) र झारखण्ड कर्मचारी छनोट आयोग (जेएसएससी) अन्तर्गत भएका भर्ती परीक्षामा अनियमितता भएको आरोप लगाउँदै महतोसहित विद्यार्थीहरूले आन्दोलन गर्दै आएका छन्। आन्दोलनकारीले परीक्षा प्रणालीमा सुधार, अनियमितताको छानबिन र दोषीमाथि कारबाहीको माग गरेका छन्।
राँचीमा ठूलो प्रदर्शन
आन्दोलनकै क्रममा अगस्ट १० मा राँचीमा आयोजित ‘विधानसभा घेराउ’ कार्यक्रममा करिब ५० हजार विद्यार्थी सहभागी भएको आन्दोलनकारीहरूको दाबी छ। विद्यार्थी नेता रविन्द्र पासवानका अनुसार प्रशासनले विभिन्न जिल्लाबाट विद्यार्थीलाई राँची आउन रोक्ने प्रयास गरे पनि ठूलो संख्यामा विद्यार्थी प्रदर्शनमा सहभागी भएका थिए।
प्रदर्शनका क्रममा प्रहरी र आन्दोलनकारीबीच झडपसमेत भएको थियो। भीड नियन्त्रणका लागि प्रहरीले अश्रुग्यास र पानीको फोहोरा प्रयोग गरेको आन्दोलनकारीहरूले बताएका छन्। उनीहरूले विद्यार्थी तथा सञ्चारकर्मीमाथि प्रहरीले लाठीचार्ज गरेको आरोपसमेत लगाएका छन्।
विद्यार्थी नेता पासवानले प्रदर्शनको सुरुवाती चरणमा प्रहरी प्रशासनले सहयोग गरे पनि साँझपछि अचानक बल प्रयोग गरिएको आरोप लगाए। महिला प्रदर्शनकारीलाई नियन्त्रणमा लिन पुरुष प्रहरी परिचालन गरिएको भन्दै उनले आपत्ति जनाएका छन्।
अर्का विद्यार्थी नेता पियुष कुमारले पनि आन्दोलन दबाउन राज्य सरकारले बल प्रयोग गरेको आरोप लगाउँदै विद्यार्थी र सञ्चारकर्मीमाथिको कारबाहीको निन्दा गरेका छन्। माग पूरा नभएसम्म आन्दोलन जारी रहने र थप कडा कार्यक्रम घोषणा गर्ने उनले चेतावनी दिएका छन्।
वार्ताका लागि तयार, तर बल प्रयोग अस्वीकार्य
आन्दोलनकारीहरूले भने सरकारसँग संवाद र वार्तामार्फत समस्या समाधान गर्न आफूहरू अझै तयार रहेको बताएका छन्। तर शान्तिपूर्ण आन्दोलनमा बल प्रयोग स्वीकार्य नहुने उनीहरूको भनाइ छ।
आन्दोलनको नेतृत्व गरिरहेको ‘कोर कमिटी’का सदस्यहरूको नाम र ठेगाना प्रशासनले माग गरेको विद्यार्थी नेताहरूले बताएका छन्। आफूहरू अपराधी नभई विद्यार्थी भएकाले आवश्यक विवरण उपलब्ध गराउन तयार रहेको उनीहरूको भनाइ छ।
सीजीएल परीक्षा रद्द र सीबीआई छानबिनको माग
विद्यार्थीहरूले झारखण्ड कर्मचारी छनोट आयोग (जेएसएससी) को संयुक्त स्नातक स्तरीय (सीजीएल) परीक्षा रद्द गर्न माग गरेका छन्। साथै कथित अनियमितताबारे केन्द्रीय अनुसन्धान ब्युरो (सीबीआई) मार्फत छानबिन गर्न तथा भर्ती प्रक्रियामा व्यापक सुधार गर्न उनीहरूको माग छ।
आन्दोलनकारीहरूले मुख्यमन्त्रीसमक्ष माग तत्काल सम्बोधन गर्न आग्रह गरेका छन्। माग बेवास्ता गरिए आन्दोलनलाई विद्यार्थीको सीमित विरोधबाट बाहिर निकालेर व्यापक जनआन्दोलनमा रूपान्तरण गर्ने चेतावनी उनीहरूले दिएका छन्।
Discussion about this post