प्रकाशको ‘भेट भए छुट्न गाह्रो’ गीत सार्वजनिक

 प्रसिद्ध गीतकार प्रकाश सुवेदीको शब्द रहेको  गीत ‘भेट भए छुट्न गाह्रो’ को भिडिओ सृजना र सेरोफेरो युट्युव च्यानल मार्फत सार्वजनिक भएको छ l राजेन्द्र बजगाईँको सङ्गीत र सङ्गीतसंयोजन रहेको गीतमा चर्तित गायक डेभिड शङ्करले स्वर दिएका छन् भने मनोज परियारले ध्वनि सम्पादन तथा मिश्रण गरेका छन्।  वर्ल्डकभर मिडियाको पोष्ट प्रोडक्सनमा निर्मित यस म्युजिक भिडिओमा वीरेन्द्र भाट ‘विपिन’ को छायाङ्कन एवं सम्पादन रहेको छ।   गीतमा आफूले प्रेम गरेकी युवती समक्ष मनको कुरा खोल्न नसकेको स्थिति, त्यस परिस्थिथिबाट उत्पन्न द्विविधा र कौतुहलतालाई मीठो ढङ्गमा प्रस्तुत गरिएको छ l आफूले मन पराएकी युवतीसँग बल्ल बल्ल भेट हुने, भेट भएको बेला पनि दिलको कुरा खोल्न नसक्ने र छुट्टिनुपर्दाको सकसलाई गीतकार सुवेदीले यथार्थपरक भावमा व्यक्त गरेका छन् l

गीतको आन्तरिक भाव बुझ्दा एक युवकले आफ्नो अति मिल्ने साथीलाई प्रेम गर्न थालेको हुन्छ। तर उसले जस्तै प्रेम युवतीले पनि गर्छे कि गर्दिन भन्ने सो युवकलाई थाह हुदैन। युवकले भेट हुँदा तनमन साट्ने कुरा गर्न खोज्छ तर सक्दैन। एकातिर कतै मैले माया पिरती र रतिरागका  कुरा गर्दा मित्रताको सम्बन्ध समेत टुट्ने हो कि भन्ने सोच्छ र अर्कोतिर यत्तिको निकट हुँदा पनि  प्रस्ताव नराख्दा आफूलाई नामर्द या काँतर नै सोच्ने हो कि सोच्छ। यो युवा अबस्थामा आउने प्राय युवाको समस्या हो। युवकको हरेक सपना र कल्पनामा उनै युवती हुन्छिन्। युवक शारीरिक र मानसिक उत्तेजनाले बिछिप्त हुँदा समेत आफूले प्रेमिकाको रूपमा मन पराईरहेको विषय प्रस्तुत गर्न सक्दैन। हामीले गीतकार सुवेदीलाई कतै यो आफ्नै कथा त हैन भनेर सोध्दा सुवेदी मुस्कुराउँदै भन्छन्  “मेरो मात्र हैन युवा अबस्थामा यो परिस्थिति तपाईँलाई पनि परेको हुन सक्छ”।   साहित्यका विविध विधामा कलम चलाउँदै आएका प्रकाश सुवेदी काल्पनिक भन्दा पनि यथार्थपरक सिर्जनामा रमाउने बहुआयामिक सर्जक हुन् l उनका रचनामा विषयगत विविधता पनि प्रशस्तै देख्न सकिन्छ l आफ्ना गीतमा फूल र जूनका शब्द उनेर स्वैर काल्पनिक माला उन्न भन्दा पनि यथार्थसँग नजिक रहेर प्रेमील गीतहरु लेख्ने प्रकाश राम्रो साहित्यिक चेतना भएका अब्बल गीतकार मानिन्छन्।