काठमाडौँ– चालू आर्थिक वर्ष २०८२/८३ को चार महिनामा पौने ७ खर्ब रुपैयाँ रेमिट्यान्स भित्रिएको छ ।
नेपाल राष्ट्र बैंकले सार्वजनिक गरेको आर्थिक तथा वित्तीय अवस्थाको प्रतिवेदन अनुसार साउनदेखि कात्तिकसम्म ६ खर्ब ८७ अर्ब १३ करोड रुपैयाँ रेमिट्यान्स भित्रिएको छ । यो गत वर्षको यही अवधिको तुलनामा ३१ दशमलव ४ प्रतिशतले बढी हो ।
राष्ट्र बैंकको तथ्याङ्क अनुसार कात्तिक महिनामै १ खर्ब ३३ अर्ब ८२ करोड रुपैयाँ रेमिट्यान्स भित्रिएको छ । गत वर्षको यही महिनामा १ खर्ब १४ अर्ब ३१ करोड रुपैयाँ रेमिट्यान्स भित्रिएको थियो ।
यस्तै, चार महिनामा वैदेशिक रोजगारीमा जाने नेपालीको सङ्ख्या घटेको छ । यस अवधिमा वैदेशिक रोजगारीका लागि अन्तिम श्रम स्वीकृति लिनेको सङ्ख्या १ लाख ४५ हजार ९ सय ७३ र पुनः श्रम स्वीकृति लिनेको सङ्ख्या १ लाख २७ हजार ८ सय ३७ रहेको छ । अघिल्लो वर्षको यही अवधिमा १ लाख ४७ हजार ४ सय ७८ जनाले अन्तिम श्रम स्वीकृति र ९४ हजार १ सय ५ जनाले पुनः श्रम स्वीकृति लिएका थिए ।
विदेशी मुद्रा सञ्चिति ३० खर्ब ५५ अर्ब ५२ करोड रुपैयाँ पुगेको छ । गत असार मसान्तसम्म यो रकम २६ खर्ब ७ अर्ब ६८ करोड रुपैयाँ थियो, जसमा १४ दशमलव १ प्रतिशत वृद्धि भएको हो ।
चार महिनासम्म चालू खाता २ खर्ब ७९ अर्ब ६५ करोड रुपैयाँले बचतमा रहेको छ भने शोधनान्तर स्थिति ३ खर्ब १८ अर्ब ४० करोड रुपैयाँले बचतमा रहेको छ ।
चालू आर्थिक वर्षको चार महिनामा कुल वस्तु निर्यात ७७ दशमलव ५ प्रतिशतले बढेर ९३ अर्ब ५० करोड रुपैयाँ पुगेको छ । कुल वस्तु आयात १८ दशमलव ७ प्रतिशतले बढेर ६ खर्ब ९ अर्ब ४५ करोड रुपैयाँ पुगेको छ । यससँगै कुल वस्तु व्यापार घाटा १२ प्रतिशतले बढेर ५ खर्ब १५ अर्ब ९६ करोड रुपैयाँ पुगेको छ ।
यस्तै, गएको कात्तिक महिनामा वार्षिक विन्दुगत उपभोक्ता मुद्रास्फीति १ दशमलव ११ प्रतिशत रहेको छ, जुन अघिल्लो वर्षको यही अवधिमा ५ दशमलव ६० प्रतिशत थियो ।
