सरकारको काम प्रति हाम्रो बेहद असन्तुष्टि छ : झलनाथ खनाल

काठमाडौं । एकीकृत समाजवादी पार्टीका सम्मानित नेता झलनाथ खनालले सरकारले देश र जनताको मागलाई सम्बोधन गर्न नसकेको बताउनुभएको छ ।
बुधबार झापामा आयोजित कार्यक्रममा बोल्दै खनालले सरकारको स्पष्ट नीति, विचार, बजेट, कार्यक्रम र योजना हुनु पर्नेमा त्यो हुन नसकेको बताउनुभयो ।
सरकारले ल्याएको नीति, कार्यक्रम र बजेटले जनतालाई छुन नसकेको उहाँको भनाइ छ । आफ्नो पार्टीले पाएको मन्त्रालयमा बजेट नै नभएको भन्दै उहाँले असन्तुष्टि जनाउनुभयो ।
आफ्नो पार्टी सरकारमा निमित्तमा मात्र सहभागी भएको खनालको भनाइ छ । ‘गठबन्धन जसरी चल्नु पर्ने थियो त्यसरी चल्न सकेको छैन, यसमा हाम्रो बेहद असन्तुष्टि छ, सामान्य होइन, यस्तो खालको सरकारमा बसेर के हुन्छ ? हामी समीक्षा गर्छौँ’, खनालले भन्नुभयो ।
राष्ट्रिय पुँजीमा नेपाली औद्योगिक क्षेत्रको योगदान १९९५ सालकाे भन्दा पनि कमजोर भएको उहाँले बताउनुभयो । परिणामस्वरुप देशमा रोजगारीको अवसर नहुँदा युवा पलायन बढेको खनालको टिप्पणी छ । यो विडम्बनापूर्ण स्थिति भएको उहाँको भनाइ छ ।