‘बुलाकी’ टिजरमा दमदार सुरक्षा

०८० सालको बैशाख १ गते (नयाँ वर्ष) बाट प्रदर्शनमा आउन लागेको फिल्म ‘बुलाकी’को टिजर सार्वजनिक भएको छ । शुक्रबार म्यूजिक डटकम च्यानलबाट सार्वजनिक भएको २ मिनेट १ सेकेन्डको टिजरमा कर्णालीको ग्रामीण जीवन, रितिथिति, परम्परा र जारी प्रथाको विषयलाई प्रस्तुत गरिएको छ । टिजरमा अभिनेत्री सुरक्षा पन्त कर्णाली भेषभुषा र लवजमा दमदार देखिएकी छन् ।

लक्ष्मण सुनारद्वारा निर्देशित फिल्मको निर्माण टोपेन्द्र विष्टले गरेका हुन । टिजर रिलिजअघि निर्माता विष्टले फिल्मको सफलताको कामना गर्दै पूजापाठ गरेका थिए । फिल्ममा सुरक्षाका अलावा नरेन खड्का, विराज बिष्ट, रमेश बुढाथोकी, लक्ष्मी गिरी, कुलदीप अधिकारी, सुशील पोखरेल, झलनाथ खत्री, धनबहादर राई, लक्ष्मण देवकोटा, प्रकाश कँडेल, सरस्वती खत्री आदिको अभिनय छ ।

छत्रेश्वरी म्यानेजमेन्टको ब्यानरमा स्वं. मोति विष्टको प्रस्तुति रहेको फिल्मलाई शिव ढकालले खिचेका हुन् । अर्जुन जिसीले सम्पादन गरेको फिल्मको स्क्रिप्ट निर्देशक सुनार स्वयं, अभिनेता विष्ट, बिराज, राजबहादुर साने र निर्मल पौडेलले तयार गरेका हुन् । डोल्पा, जाजरकोट र रुकुम पश्चिमका विकट स्थानमा छायांकन भएको फिल्मको वितरण त्रिनेत्रम् डिस्ट्रिब्युसन र एफडी कम्पनीले गर्दैछ ।