काठमाडौं – लेखक साहित्यकार सूब सेनद्वारा लिखित पाँच पुस्तक एकसाथ लोकार्पित भएको छ । दायित्व वाङ्मय प्रतिष्ठानद्वारा शुक्रबार आयोजित कार्यक्रममा प्रमुख अतिथि नेपाल प्रज्ञा प्रतिष्ठानका पूर्वकुलपति गंगाप्रसाद उप्रेती लगायतले उक्त कृतिहरू सार्वजनिक गरे ।
कार्यक्रममा साहित्यकार सेन लिखित दुई उपन्यास ‘उमा–गौरी’, ‘शिवश्याम’, संस्मरणसंग्रह ‘असाधारण मुमाबुवाको साधारण छोरो’ सार्वजनिक गरियो । त्यस्तै, लेखक सेनको संकलन रहेको ‘व्यक्ति एक : दृष्टिमा अनेक’ र ‘हस्ताक्षर भूमिकासँग्रह’ पनि सार्वजनिक गरियो । यसअघि सूब सेनका विभिन्न विधाका गरी ६४ वटा कृतिहरू प्रकाशित छन् ।
कार्यक्रमका प्रमुख अतिथि उप्रेतीले उपन्यास उमा गौरीको समीक्षात्मक चर्चा गर्दै उनको साहित्यिक सक्रियताको प्रशंसा गरे ।
उक्त अवसरमा डा. रामदयाल राकेशले शिवश्यामको, प्रा.डा. भागवत ढकालले हस्ताक्षर भूमिका संग्रहको, ठाकुर शर्मा भण्डारीले असाधारण मुमाबुवाको साधारण छोरोको र रामप्रसाद पन्तले व्यक्ति एक दृष्टिमा अनेक पुस्तकको समीक्षात्मक टिप्पणी गरे ।
कार्यक्रममा आख्यानकार भागीरथी श्रेष्ठ, कृतिकार सूब सेन, सुयशप्रताप सिंह, प्रा. हेमन्त शमशेर र हुमकला पाण्डेले आफ्नो धारणा राखे ।
