साहित्यतर्फको नोबेल पुरस्कार नर्वेजियन लेखक युन फोसालाई

स्टकहोम । यस वर्षको साहित्यतर्फको नोबेल पुरस्कार नर्वेजियन लेखक युन फोसालाई प्रदान गरिएको छ । नोबेल पुरस्कार दिने स्वीडिस एकेडेमीले युन फोसाको अभिनव (प्रयोगात्मक) नाटक र गद्यले आफूलाई अभिव्यक्त गर्न नसक्नेलाई आवाज दिएको बताएको छ ।

सन् १९५९ मा जन्मिएका फोसाले ४० भन्दा बढी नाटक, धेरै उपन्यास, निबन्ध र बाल पुस्तकहरू लेखेका छन्। यसका अलावा उनले अनुवादको क्षेत्रमा पनि योगदान दिएका छन् ।

फोसाले प्रतिष्ठित अवार्ड पाउँदा आफू ‘अति अभिभूत र केही हदसम्म डराएको’ बताएका छन् । ६४ वर्षीय लेखकका प्रमुख कार्यहरूमा उपन्यासहरू बोथहाउस र मलान्कोली एक र दुई समावेश छन्। यता नर्वेजियन प्रधानमन्त्री जोनास गाहर स्टोरेले भने, ‘यो सम्मानले पूरै देश आज गर्व गरिरहेको छ ।’