काठमाडौँ । संयुक्त राष्ट्र संघको महासभाले बुधवार २०२६ को मिलानो–कोर्टिना ओलम्पिक र प्यारालिम्पिक शीतकालीन खेलहरूको लागि ओलम्पिक युद्धविराम सम्बन्धी प्रश्ताव पारित गरेको छ ।
खेलकुद र ओलम्पिक आदर्शमार्फत शान्तिपूर्ण र राम्रो संसार निर्माण गर्ने शिर्षकको प्रश्तावले संयुक्त राष्ट्र संघका सदस्य राष्ट्रहरूलाई संयुक्त राष्ट्र संघको बडापत्रको ढाँचाभित्र व्यक्तिगत र सामूहिक रूपमा ओलम्पिक युद्धविराम पालना गर्न आग्रह गरेको छ ।
ओलम्पिकको वेबसाइटकाअनुसार ओलम्पिक युद्धविराम युद्धविराम र प्रतिष्पर्धा अवधिमा ग्यारेन्टी गरिएको सुरक्षा हो । संकल्पले सबै संयुक्त राष्ट्र संघका सदस्य राष्ट्रहरूलाई अन्तर्राष्ट्रिय ओलम्पिक समिति र अन्तर्राष्ट्रिय प्यारालिम्पिक समितिसँग दुवै खेलहरूको अवधिभर र बाहिर द्वन्द्वका क्षेत्रहरूमा शान्ति, संवाद, सहिष्णुता र मेलमिलापलाई प्रवद्र्धन गर्न खेलकुदलाई उपकरणको रूपमा प्रयोग गर्ने प्रयासमा सहयोग गर्न आह्वान गर्दछ । ओलम्पिक र प्यारालम्पिक शीतकालीन खेलहरू अर्को वर्ष फेब्रुअरी ६ देखि २२ र मार्च ६ देखि १५ सम्म इटालीको मिलान र कोर्टिना डी’एम्पेजोमा आयोजना हुनेछन् ।
