काठमाडौं – अमेरिकी नौसेनाले विश्वकै सबैभन्दा ठूलो युद्धपोत, यूएसएस जेराल्ड आर फोर्डलाई ग्रीसको क्रेटमा तैनाथ गरेको छ । क्रेटमा अमेरिकी नौसेनाको अड्डा रहेको छ ।
इरानमाथि अमेरिकी हमला हुन सक्ने आशंकाबीच यस विमानवाहक युद्धपोतलाई क्रेटमा तैनाथ गरिएको हो ।
फोर्ड युद्धपोत सोमबार ग्रीसको यस टापुमा पुगेको समाचार एजेन्सी एएफपीका एक फोटोग्राफरले जनाएका हुन् ।
ग्रीसको रक्षा मन्त्रालयले विमानवाहक युद्धपोतको आगमनका बारेमा कुनै प्रतिक्रिया दिएको छैन । त्यस्तै, एथेन्सस्थित अमेरिकी दूतावासले पनि समाचार एजेन्सीको प्रश्नमा हालसम्म कुनै जवाफ दिएको छैन ।
अमेरिकी नौसेनाका दुईवटा युद्धपोतहरू मध्यपूर्व नजिक पुग्नुलाई धेरै विज्ञहरूले एउटा विशेष संकेतका रूपमा हेरेका छन् । यूएसएस अब्राहम लिंकन एयरक्राफ्ट क्यारियर पनि अहिले मध्यपूर्वमा तैनाथ छ ।
अमेरिकाले गत वर्ष १२ दिनसम्म चलेको इरान–इजरायल युद्धका बेला पनि यी दुवै विमानवाहक युद्धपोतहरूलाई मध्यपूर्वमा तैनाथ गरेको थियो ।
अमेरिका र इरानबीच यस समयमा इरानको विवादित परमाणु कार्यक्रममाथि वार्ता पनि चलिरहेको छ । मंगलबार भएको वार्तालाई ट्रम्प प्रशासनले उत्साहजनक बताएको छ ।
यद्यपि, अमेरिकी राष्ट्रपति डोनाल्ड ट्रम्पले बारम्बार यदि इरान परमाणु कार्यक्रममा झुकेन भने अन्य विकल्पहरू प्रयोग गरिने चेतावनी पनि दिइरहेका छन् । एजेन्सी
