काठमाडौँ – अमेरिकी राष्ट्रपति डोनाल्ड ट्रम्पले होर्मुज जलडमरूलाई खुला र सुरक्षित राख्नका लागि धेरै देशले अमेरिकासँग मिलेर युद्धपोत पठाउन सक्ने बताएका छन् । उनले यस समुद्री मार्ग बन्द भएमा प्रभावित भएका देशहरूले संयुक्त रूपमा कदम चाल्न सक्ने बताएका हुन् ।
ट्रम्पले आफ्नो सामाजिक सञ्जालमार्फत लेख्दै होर्मुज जलडमरू विश्व व्यापारका लागि अत्यन्त महत्वपूर्ण मार्ग भएकाले यसलाई सुरक्षित र खुला राख्न विभिन्न देशले अमेरिकासँग मिलेर नौसैनिक जहाज पठाउन सक्ने उल्लेख गरेका छन् । उनका अनुसार यस कदमले समुद्री मार्गमा आवतजावतलाई सुरक्षित बनाउन सहयोग पुग्नेछ ।
उनले चीन, फ्रान्स, जापान, दक्षिण कोरिया र बेलायत लगायतका देश पनि यस्तो प्रयासमा सहभागी हुन सक्ने आशा व्यक्त गरेका छन् । तर ती देशहरूले वास्तवमै युद्धपोत पठाउने सहमति गरेका छन् वा छैनन् भन्ने विषय अझै स्पष्ट भइसकेको छैन ।
यसबीच बेलायतको रक्षा मन्त्रालयले क्षेत्रको समुद्री सुरक्षाका विषयमा आफ्ना सहयोगी देशहरूसँग विभिन्न विकल्पबारे छलफल भइरहेको जनाएको छ ।
ट्रम्पको भनाइप्रति इरानले कडा प्रतिक्रिया दिएको छ । इरानका विदेशमन्त्री अब्बास अराघचीले ह्वाइट हाउसको नीति समस्या समाधान गर्नुको सट्टा झन् बढाउने दिशामा गएको टिप्पणी गरेका छन् ।
अराघचीले अमेरिकाको सुरक्षा व्यवस्था कमजोर देखिएको भन्दै अहिले अमेरिका अन्य देश, यहाँसम्म कि चीनसँग पनि सहयोग माग्ने अवस्थासम्म पुगेको आरोप लगाए। एजेन्सी
