साहित्यकार भुवनहरि सिग्देलको नयाँ उपन्यास ‘मनस्विनी’ औपचारिक रूपमा सार्वजनिक भएको छ । प्रकाशक पेज टर्नरले शनिबार नेपाल प्रज्ञा-प्रतिष्ठानमा आयोजना गरेको विशेष समारोहमा उपन्यासकार सिग्देल तथा समालोचक डा. अर्चना थापा र महेश पौड्यलले संयुक्त रूपमा कृतिको लोकार्पण गर्नुभएको थियो ।
‘मनस्विनी’ पुरुष आकृतिको क्लीब पात्र गोविन्द र नारी पात्र मनस्विनीबीचको बेमेल विवाह र त्यसबाट उत्पन्न हुने मानसिक, सामाजिक तथा पारिवारिक जटिलताहरूमाथि केन्द्रित छ । उपन्यासले फरक लैङ्गिक स्वभाव भएका व्यक्तिहरूले भोग्नुपरेका समस्यालाई समाजको कठोर मूल्य-मान्यतासँग जोडेर प्रस्तुत गरेको छ ।
कार्यक्रममा समालोचक डा. अर्चना थापाले उपन्यासले फरक लैङ्गिकताको संवेदनशील मुद्दालाई बहसको केन्द्रीय विषय बनाएको भन्दै प्रशंसा गर्नुभयो । पुरुषप्रधान मूल्य-विधानले सिर्जना गरेको अन्याय र विभेदलाई चुनौती दिने यस्ता साहित्यिक कृतिहरू आवश्यक रहेको उहाँले बताउनुभयो । समालोचक महेश पौड्यलले महिला तथा फरक लैङ्गिक पहिचान भएका व्यक्तिमाथि समाजले थोपरेका विभेदकारी मान्यताहरू पुनर्निर्माण गर्न आवश्यक रहेको भन्दै ‘मनस्विनी’ ले एउटा अर्थपूर्ण बहसको थालनी गरेको टिप्पणी गर्नुभयो ।
उपन्यासकार सिग्देलले आफूले समाजमा देखे-भेटेका फरक लैङ्गिक स्वभावका व्यक्तिहरूको वास्तविक जीवन-अनुभूति र बेमेल विवाहले जन्माउने असहजतालाई केन्द्रमा राखेर उपन्यास रचना गरेको बताउनुभयो। “सहज वैवाहिक सम्बन्धमा स्वाभाविक ठानिने यौन र प्रजननसम्बन्धी व्यवहार असहज सम्बन्धमा पीडाको मूल कारण बन्न सक्छन्; समाजलाई यही विषयतर्फ सचेत गराउनु नै उपन्यासको उद्देश्य हो,” सिग्देलले भन्नुभयो ।
