काठमाडौं — वैदेशिक रोजगार विभाग ताहाचलबाट विचौलियाको काम गर्ने १३ जना व्यक्तिहरू पक्राउ परेका छन् ।काठमाडौं उपत्यका अपराध अनुसन्धान कार्यालयको टोलीले बुधबार १३ जनालाई पक्राउ गरेको हो ।वैदेशिक रोजगारको सिलसिलामा ठगिएका पीडितहरू न्यायका लागि वैदेशिक रोजगार विभागमा जाँदा विचौलियाले घेराबन्दी गर्दै विभिन्न बहानामा बार्गेनिङ गरेको पाइएपछि पक्राउ गरिएको अपराध अनुसन्धान कार्यालयका एसपी काजिकुमार आचार्यले बताए ।
श्रम स्वीकृतीका लागि विभागमा जाने सेवाग्राहीहरुलाई दु:ख हैरानी दिइ बिचौलिया प्रयोग गर्न बाध्य बनाउने गरेको प्रहरीले बताएको छ ।पक्राउ पुर्जी जारी गरिदिन सहयोग गर्ने साथै वैदैशिक रोजगार मुद्दाका संलग्नहरूलाई आफ्नो समूहले पक्राउ गरिदिने जस्ता झुट्ठा प्रलोभन देखाइ मोलमोलाइ गर्ने गरेको प्रहरीले बताएको छ ।
वैदेशिक रोजगार विभाग परिसरमा पछिल्ला केही दिनयता विचौलिया समूहहरूले सेवा लिने नागरिकलाई विभिन्न बहानामा रोक्ने, घेराबन्दी गर्ने तथा रकम बार्गेनिङ गर्ने गतिविधि बढेको भेटिएपछि विभागले कडाइका साथ निगरानी थाल्ने भएको छ।
विभागका अनुसार कतिपय दलालहरू ‘छिटो काम मिलाइदिन्छौँ’, ‘फाइल अघि बढाइदिन्छौँ’ जस्ता प्रलोभन देखाउँदै सेवाग्राहीलाई कार्यालय बाहिरमै रोक्ने र अवैध शुल्क माग्ने गतिविधि बढिरहेको पाइएको हो। विभागले यस्तो व्यवहारले रोजगारीका लागि वैदेशिक तयारीमा रहेका श्रमिकहरू ठगिन सक्ने भन्दै तत्काल नियन्त्रण आवश्यक ठानेको छ।
यसअघि पनि विभागले कार्यालय परिसरभित्र दलाल प्रवेशमा रोक लगाएको थियो। तर बाहिरका क्षेत्रहरूमा सक्रियतापूर्वक कार्यरत समूहहरूले विभिन्न नाम र पहिचान प्रयोग गरी नयाँ–नयाँ शैलीमा सेवाग्राहीलाई लक्ष्य बनाइरहेको विभागको भनाइ छ।विभागले सुरक्षा निकायसँग समन्वय गरी नियमित अनुगमन, CCTV निरीक्षण र अनधिकृत व्यक्ति प्रवेशमा कडाइ गर्ने तथा ठगीमा संलग्न व्यक्तिमाथि कानुनी कारबाही प्रक्रिया अघि बढाइने जनाएको छ।सेवाग्राहीलाई आधिकारिक प्रक्रियाबाट मात्रै काम गर्न र कुनै पनि अवैध शुल्क नतिर्न विभागले अनुरोध गरेको छ।
