काठमाडौं – थाइल्यान्डले कम्बोडियामाथि हवाई आक्रमण सुरु गरेको छ । कम्बोडियासँगको झडपपछि हवाई आक्रमण सुरु गरिएको थाइल्यान्डको सेनाले जनाएको छ ।
बीबीसीका अनुसार थाइल्यान्ड र कम्बोडियाको विवादित सीमा क्षेत्रमा यो आक्रमण भएको हो ।
स्थानीय समयअनुसार सोमबार बिहान आफ्नो सेनाको एक टुकडीमाथि कम्बोडियाबाट फाइरिङ सुरु भएको थाइल्यान्डको सेनाले जनाएको छ । उक्त आक्रमणमा आफ्ना एक सैनिक मारिएका र अन्य आठजना घाइते भएका थाइल्यान्डले जनाएको बीबीसीले उल्लेख गरेको छ ।
उता कम्बोडियाले भने थाइल्यान्डले आक्रमण सुरु गरेको दाबी गरेको छ । यद्यपि, आफूहरूले उक्त आक्रमणको जवाफ नदिएको कम्बोडियाले जनाएको छ ।
दुवै देशले एक-अर्कामाथि युद्धविराम उल्लंघन गरेको आरोप लगाएका छन् । अमेरिकी राष्ट्रपति डोनाल्ड ट्रम्प तथा मलेसियाको मध्यस्थतामा थाइल्यान्ड र कम्बोडियाबीच युद्धविराम भएको थियो ।
यही वर्षको जुलाईमा दुई देशबीच पाँच दिनसम्म आक्रमण-प्रत्याक्रमण भएको थियो । जसमा परी कम्तिमा ४८ जना मारिएका थिए भने करिब ३ लाख विस्थापित भएका थिए ।
