भारती गौतमलाई ‘उत्तमशान्ति पुरस्कार अर्पण’

काठमाडौँ, १२ चैत्र, भारती गौतमद्वारा लिखित संस्मरण कृतिलाई २०७७ सालको ‘उत्तमशान्ति पुरस्कार’ एक समारोहबीच प्रदान गरिएको छ । गत जेठ १२ मा प्रदान गरिनु पर्ने पुरस्कार कोविड-१९ का कारणले ढिलो हुन गई शनिवार प्रदान गरिएको हो ।

२७ वर्षको उमेरमै “श्रष्टा र साहित्य” नामक अन्तर्वार्ता कृतिमा मदन पुरस्कार प्राप्त गर्नु भएका उत्तम कुँवर कुनै समय ‘रूपरेखा’ नामक प्रख्यात साहित्यिक पत्रिकाका प्रकाशक र सम्पादक हुनुहुन्थ्यो । ४३ वर्षको उमेरमै दिवंगत हुनुभएका कुँवरको देहावसानपछि उहाँकी धर्मपत्नि शान्ति कुँवरले यो पुरस्कारको स्थापना गर्नुभएको हो । उहाँको पनि देहावसान भएपछि ‘उत्तमशान्ति पुरस्कार’ भनेर पुनर्नामाकरण गरिएको हो । हाल १ लाख राशि रहेको यो पुरस्कार वर्षभरि प्रकाशित गैरआख्यान कृतिमध्ये चयन समितिबाट उचित ठानिएको कुनै एक कृतिलाई प्रदान गरिन्छ । विगतमा यस पुरस्कारबाट मंजुल, लैनसिंह वाङ्देल,अम्बर गुरूङ, कृष्ण धरावासी, झमक घिमिरे, रामेश, गणेश रसिक, नारायण ढकाल, भुपिन, रविन्द्र समिर, कर्ण शाक्य, दुर्गा घिमिरे लगायतले यो पुरस्कार प्राप्त गरिसक्नु भएको छ । २०७८ सालभरिमा प्रकाशित गैरआख्यान कृतिलाई आउँदो जेठ १२ गते पुरस्कार समर्पण गरिनेछ र त्यसका लागि ‘उत्तम कुँवर स्मारक पुरस्कार गुठी’ ले कृतिको आह्वान गरिसकेको छ ।

‘विगत र बाडुली’ मा लेखक भारती गौतमले कतिपय निजात्मक अनुभूतिलाई विचार, कला र संवेदना मार्फत समकालीन समाज र त्यसभित्रका मानवीय सम्बन्धका अनेक आयामहरूको चर्चा गर्नुभएको छ । सरल भाषा मार्फत जीवन जगतका जटिल कुराहरूलाई अभिव्यक्त गर्न सफल भएवापत लेखक भारती गौतमलाई २०७७ सालको उत्तमशान्ति पुरस्कार प्रदान गरिएको व्यहोरा गुठीद्वारा जारी विज्ञप्तिमा उल्लेख गरिएको छ ।