दमासकस – सिरियाली सरकार र कुर्दिस नेतृत्वको सिरियन डेमोक्रेटिक फोर्सेस (एसडीएफ) बिच देशव्यापी युद्धविरामको घोषणा भएको छ।
यो ऐतिहासिक सम्झौतासँगै सिरियाली सरकारले लगभग पूरै देशमा आफ्नो नियन्त्रण कायम गरेको छ। दमासकसमा भएको १४ बुँदे सहमति अनुसार अब विद्रोही कुर्दिस लडाकुहरूलाई सिरियाली सरकारी सेना र राज्यका अन्य निकायहरूमा एकीकृत गरिने भएको हो।
राष्ट्रपति अहमद अल-शरा र अमेरिकी विशेष दूत टम ब्याराकबिचको भेटवार्ता लगत्तै यो घोषणा सार्वजनिक भएको हो। सम्झौता अनुसार कुर्दिसको नियन्त्रणमा रहेका अल-हसाका, देइर एजोर र रक्का जस्ता महत्त्वपूर्ण प्रान्तहरूमा अब सरकारी प्रशासन फर्कनेछ।
वर्षौँदेखि कुर्दिस प्रशासनले चलाउँदै आएका नागरिक निकाय, सीमा नाका र तेल तथा ग्यास खानीहरू अब केन्द्र सरकारको मातहतमा आउनेछन्। बदलामा दमासकसले सन् १९४६ मा फ्रान्सबाट स्वतन्त्र भएयता पहिलो पटक कुर्दिस भाषालाई आधिकारिक मान्यता दिने र कुर्दिस नयाँ वर्षलाई राष्ट्रिय बिदा घोषणा गर्ने वाचा गरेको छ।
एसडीएफ कमान्डर मज्लुम अब्दीले टेलिभिजनमार्फत सम्बोधन गर्दै युद्ध रोक्नका लागि यो सम्झौता अनिवार्य भएको बताएका छन्। अमेरिकाको समर्थनमा इस्लामिक स्टेट (आईएस) विरुद्ध लडेको यो फौजले उत्तर-पूर्वी सिरियामा आफ्नो स्वायत्त शासन चलाउँदै आएको थियो। नयाँ व्यवस्था अनुसार आईएसका हजारौँ विदेशी लडाकुहरू थुनिएका जेल र शिविरहरूको जिम्मेवारी पनि अब सिरियाली सरकारले नै लिनेछ।
यो सम्झौतालाई अमेरिकाले पनि ‘एकीकृत सिरिया’ तर्फको महत्त्वपूर्ण कदम भन्दै स्वागत गरेको छ। केही दिन अघि मात्रै कुर्दिस सेना र सरकारी सेनाबिच झडप भए पनि यो नयाँ सहमतिले वर्षौँदेखिको विभाजन अन्त्य गर्ने अपेक्षा गरिएको छ। सिरियाली राष्ट्रपतिले देशको एक चौथाइ भूभाग र मुख्य स्रोतहरू विद्रोहीको कब्जामा रहनु अस्वीकार्य रहेको बताउँदै आएका थिए। एजेन्सी
