लक्ष्मी शर्माको कथासंग्रह ‘हजुरआमा’ विमोचित

काठमाडौं-कथाकार लक्ष्मी शर्माको पहिलो कथाकृति ‘हजुरआमा’ लोकार्पण गरिएको छ । शनिबार नेपाल स्रष्टा समाजद्वारा काठमाडौंमा  आयोजित कार्यक्रममा प्रमुख अतिथि अग्रज कथाकार भागीरथी श्रेष्ठलगायतले कृति सार्वजनिक गरे ।
कृति सार्वजनिक गर्दै श्रेष्ठले ‘हजुरआमा’भित्र रहेका कथाहरूले आफूलाई आकर्षित गरेको बताइन् । श्रेष्ठले भनिन्, “कथा पढ्दा मेरी हजुरआमालाई सम्झेर म खुब रोएँ । लक्ष्मी बहिनी राम्रा कथाहरू लिएर कथाको उज्यालोमा प्रवेश गर्नुभएको छ । उहाँलाई शुभकामना छ ।”
कृतिमाथि समीक्षा गर्दै शेषनाथ पौडेलले लघु आयाममा लेखिएका ‘हजुरआमा’भित्रका कथाहरूमा नारी पात्रको बाहुल्यता रहेको बताए । उनले यो कथाकृति पारिवारिक जीवनको अभिलेख भएको उल्लेख गरे ।
अर्का समीक्षक चुडामणि पौडेलले कृतिकारले समाजमा देखे भोगेका सन्दर्भलाई संस्मरणात्मक शैलीमा प्रस्तुत गरेको बताउँदै कृतिका कथाहरूमा महिलाका कथा व्यथा प्रस्तुत भएको चर्चा गरे ।
साहित्यकार श्रीओम श्रेष्ठ ‘रोदन’ले कथाकार शर्माको एउटा अर्को सन्तानको जन्म भएको उल्लेख गर्दै उनका कथा शालीन र सरल भएको बताए ।
कार्यक्रममा कथाकार शर्माले आफ्नो लेखन यात्राबारे बोलिन् । उक्तअवसरमा डा. दीनबन्धु शर्मा, केशव पराजुली, तारा सुवेदीले बोलेका थिए ।