१५ जेष्ठ, काठमाडौँ, कवि एलपि पराजुलीका दुई पुस्तक सार्वजनिक भएका छन् । भुगोल साहित्य समाज र छेस्का साहित्य नेपालको आयोजनामा राष्ट्रिय महिला आयोगको सभाहलमा सम्पन्न भएको उक्त लोकार्पण कार्यक्रममा अरु दुई काव्यकृतिको पनि विमोचन भएको थियो । ‘काव्य—सुधा’ रम्बास् कवितासंग्रह र ‘छनक’ छेस्का कवितासंग्रह’ कवि एलपि पराजुलीका कृतिहरु हुन् । कार्यक्रमको प्रमुख आतिथ्य नेपालप्रज्ञा प्रतिष्ठानका प्राज्ञ सदस्य साहित्यकार देवी नेपालले गरेका थिए ।
‘काव्य—सुधा’ रम्बास् कवितासंग्रह माथि समालोक दीपक सुवेदीले टिप्पणी गरेका थिए भने ‘छनक’ छेस्का कवितासंग्रह माथि टंक पन्थले समीक्षात्मक टिप्पणी गरेका थिए । कवि एल पि पराजुलीले लेखकीय मन्तव्य राख्नुका साथै कृतिभित्रका रचना वाचन गरेका थिए ।
कार्यक्रममा कर्णाद महर्षी, दिव्य गिरी, प्रतीक ढकाल, कात्यायन, खेमराज पोख्रेल लगायत धेरै साहित्यकारको उपस्थिति रहेको थियो । भूगोल साहित्य समाजका अध्यक्ष तथा छेस्का कविताका प्रवर्तक विनोद नेपालको अध्यक्षतामा कार्यक्रम सम्पन्न भएको थियो ।
