“खोलभित्रको मान्छे” कविता संग्रह सार्वजनिक

१८असार,काठमाडौँ, अठ्तीस वर्षकै उमेरमा दिवंगत हुनुभएका कवि मित्रप्रसाद दुलालद्वारा रचित कविताहरुको संग्रह “खोलभित्रको मान्छे” सार्वजनिक गरिएको छ ।

कीर्तिपुर – ४, प्रगति हाइटस्थित दुलाल निवासमा केही साहित्यकारको उपस्थिति र पारिवारिक जमघटका बीच कविता संग्रहको लोकार्पण साहित्यकार डा. दामोदर पुडासैनी ‘किशोर’ र कविका पिता छविप्रसाद दुलालबाट गरियो ।

लोकार्पण कार्यक्रममा स्वर्गीय कविको सालीन व्यक्तिक्व र उनको साहित्यिक लगावको बारेमा चर्चा गर्दै कवि नरनाथ लुइटेलले कविको मृत्युचेतको अनुभूति स्वर्गीय दुलालले रचना गरेको कविता “अपरिचित यात्रा” मार्फत व्यक्त गर्नुभएको थियो ।

स्वर्गीय कविका दाजु गोपाल प्रसाद दुलालले स्वागत मन्तव्य राख्नुभएको सो कार्यक्रममा प्रमुख अतिथि साहित्यकार डा. दामोदर पुडासैनी ‘किशोर’ले कवि मित्रप्रसाद दुलालद्वारा रचित कविताहरुको संग्रहले कविलाई अमर बनाएको साथै नेपाली साहित्यमा एउटा नवीन कृति थपिएको विचार व्यक्त गर्नुभयो ।

जीवित रहँदा समाजिक संजालमा आफ्ना रचना सार्वजनिक गरिरहने कवि मित्रप्रसाद दुलालको कविताहरू संकलन गरी परिवारका सदस्यहरुले संग्रहका रुपमा सार्वजनिक गर्नुलाई स्वर्गीय कवि र नेपाली साहित्यप्रतिको उच्च सम्मान भएको विचार उहाँको थियो ।

२०३७ सालमा मोरङ जिल्लाको अमरदहमा जन्मिनुभएका कवि मित्रप्रसाद दुलाल काठमाडौँलाई कर्मथलो बनाई एक सहकारी अभियन्ता, कानुन व्यवसायी र समाजसेवीको रुपमा परिचित हुनुहुन्थ्यो ।

२०७६ जेठ ३२ गते राति हृदयघातका कारण उहाँको निधन भएको थियो । संजय सिम्खडा र गोकुल बाँस्तोलाले संकलन गरेका स्वर्गीय कवि दुलाल रचित कविताहरूको सम्पादन डा. दामोदर पुडासैनी ‘किशोर’ले गर्नुभएको हो । छविप्रसाद दुलाल र सम्झना सिम्खडा दुलाल प्रकाशक रहनुभएको कविता संग्रहमा कवि मित्रप्रसाद दुलालले जीवित रहँदा रचना गरेका र समाजिक संजालमा सार्वजनिक गरेका एक सय उनन्चास कविताहरू संग्रहित छन् ।