२४ दमक। इलाम चुलाचुलीका स्थायीवासी कवि सुन्दर कुरुपलाई यो वर्ष अर्थात् २०७९ सालको ‘जसुदा स्मृति पुरस्कार’ प्रदान गरिने भएको छ । बिहीबार बसेको भानु प्रतिमा संरक्षण तथा साहित्य सम्वर्द्धन समितिको बैठकले २०७९ सालको ‘जसुदा स्मृति पुरस्कार’ कवि कुरूपलाई दिने निर्णय गरेको हो ।
चुलाचुली इलामका रैथाने युवा कवि तथा गजलकार कुरुपलाई नगदसहित सम्मानपत्रले पुरस्कृत हुने भएका छन् । इलामकी चेली कवि तथा पत्रकार जसुदा खाकीको स्मृतिमा उनका पति पत्रकार पुष्पराज प्रधान तथा उनका परिवारले पुरस्कारको स्थापना गरेका हुन् ।
कवि कुरूपका दुई कृतिहरू ‘जुनको अनुहार’ र ‘पृथ्वीको आविष्कार’ प्रकाशित छन् । यहीँ महिनाको अन्तिममा सदरमुकाममा एक समारोहबीच सो पुरस्कार प्रदान गरिने समितिले जनाएको छ ।
