बिक्रमभक्त जोशीकृति कथासङ्ग्र ‘चोभार ब्लुज’को लोकार्पण सम्पन्न भएको छ । वरिष्ठ आख्यानकार तथा प्राज्ञ माया ठकुरीको प्रमुख आतिथ्यतामा राष्ट्रिय नाचघरमा आयोजित समारोहमा पुस्तकको लोकार्पण गरिएको हो ।
जोशीका कथाहरुले यात्रालाई पृष्ठभूमि बनाएको प्रशंग उप्काउँदै माया ठकुरीले भन्नु भयो, ‘बिक्रम भाइ यात्राहरुमा निस्किरहनु हुन्थ्यो । म कहिलेकहीँ बुहारीलाई जिस्काउँथे पनि । तर उहाँले आज यति राम्रो पुस्तक हामीलाई उपहार दिनु भयो । उहाँ त यात्रामा त कथा टिप्न पो जानु हुँदो रहेछ ।’
पुस्तकका प्रकाशक तथा साहित्यपोस्टका प्रधान सम्पादक अश्विनी कोइराला सभापति रहेको कार्यक्रममा लेखकका पिता प्रभु भक्त जोशी विशेष अतिथिको भूमिकामा उपस्थिति रहेको थियो । अन्य अतिथिहरुमा समीक्षकद्वय महेश पौड्याल र राजकुमार बानियाँ, पुस्तकका सम्पादक दीपक दर्शन दाहाल तथा भाषा सम्पादक रमेश दाहालको उपस्थिति रहेको थियो ।
कार्यक्रममा पुस्तकमाथि समीक्षात्मक टिप्पणी राख्दै जोशीका कथाहरुले कसैले नभनेका, देखेर पनि वास्ता नगरेका चोभारको कथा लेखेको महेश पौड्यालले बताए । उनले भने, ‘चोभारको बाटो भएर म पनि धेरैपटक हिँडेको छु । तर फेरि हिँड्दा म पहिले जस्तो हिँड्ने छैन । चोभार ब्लुजका कथाहरुले मलाई मोड मोडमा उभ्याउने छन् ।’
त्यस्तै अर्का समीक्षक राजकुमार बानियाँले भने, ‘कथाहरु राम्रा त छँदै छन्, साथै यदि कसैले सामान्य नेवारी भाषा सिक्नु छ भने पनि यो पुस्तक पढ्दा राम्रो हुन्छ । दोहोरो फाइदा हुन्छ ।’
समारोहको सुरुवातमै वीरेन्द्र हमाल निर्देशित लघुनाटक मञ्चन गरिएको थियो । चोभार ब्लुजमै भएका कथाको नाट्य रुपान्तरणसमेत विरेन्द्र हमालले नै गरेका हुन् । नाटकमा हमालका १८ जना विद्यार्थीहरुले अभिनय भरेका थिए भने चार जनाले प्रविधिक पक्षबाट सहयोग गरेका थिए ।
कार्यक्रममा प्रमुख अतिथि माया ठकुरी, विशेष अतिथि प्रभु भक्त जोशी तथा नाटक निर्देशक वीरेन्द्र हमाललाई लेखक र प्रकाशकका तर्फबाट दोसल्लाका साथमा सम्मानपत्र हस्तान्तरण गरिएको थियो भने अन्य अतिथिहरुका साथै नाटक मञ्चमा संलग्न १८ जना कलाकार र ४ जना प्राविधिकलाई स्मृतिचिन्ह वितरणसमेत गरिएको थियो ।
लेखककी छोरी नितिशा जोशी स्वागत मन्तव्य राखेको कार्यक्रमको सञ्चालन कृष्ण ढुङ्गेलले गरेका थिए ।
निकथासङ्ग्रह ‘चोभार ब्लुज’ इन्जिनियर बिक्रम भक्त जोशीको पहिलो कृति हो । बैंकरसमेत रहेका जोशी केही समययता व्यवसायिक कार्य छाडेर साहित्य साधनामा लागेका छन् । जोशीका कथाभित्र वाग्मती सभ्यताका कुराहरु छन् । वाग्मती सभ्यताको केन्द्रमा रहेको काठमाडौँको आञ्चलिकता छ । नेवारी जनजीवन, सभ्यताका अंश छन् र आधुनिकता पसेसँगै काठमाडौँले गुमाएका अर्गानिकीकरणको अनौठा पीडा पनि छन् ।
